Fimm framboð skiluðu inn framboðslistum sínum í Reykjavík nú fyrir hádegi, til viðbótar við þau ellefu sem höfðu skilað inn í gær. Framboðsfrestur rann út kl. 12 á hádegi og því er ljóst að sextán framboð gefa kost á sér í borgarstjórnarkosningunum 26. maí næstkomandi.
Þau framboð sem skiluðu inn framboðslistum í dag voru Framsóknarflokkurinn, Sjálfstæðisflokkurinn, Flokkur fólksins, Borgin okkar Reykjavík og Karlalistinn.
Þetta staðfestir Eva B. Helgadóttir, formaður yfirkjörstjórnar í Reykjavík. Hún sagði að ekkert framboð hefði verið á síðustu stundu, heldur hafi síðasti framboðslistinn borist um kl. 11.
Þau framboð sem skilað var inn í gær voru Íslenska þjóðfylkingin, Alþýðufylkingin, Samfylkingin, Höfuðborgarlistinn, Sósíalistaflokkur Íslands, Vinstri græn, Viðreisn, Frelsisflokkurinn, Miðflokkurinn, Kvennahreyfingin og Píratar.