Músíktilraunir 2015 - 2. undankvöld

Electric Elephant er hljómsveit úr Árbæ og Hafnarfirði. Hana skipa Magnús Jóhann Ragnarsson, sem spilar á Rhodes rafpíanó, clavinet, Hammond-orgel, píanó og hljóðgervla, Snorri Örn Arnarsson, sem spilar á bassa, Árni Svavar Johnsen sem spilar á rafgítar og syngur, og Gottskálk Daði Reynisson, sem spilar á trommur. Þeir eru nítján til 22 ára gamlir.

Selfyssingarnir í Gasoline Spills heita Árni Hofritz gítarleikari og söngvari, Arek Alejnikow bassaleikari, Ívar Ragnarsson gítarleikari og söngvari og Úlfur Kvaran trommuleikari. Þeir eru sautján ára nema Arek, sem er nítján.

Kraðakið er úr Reykjavík, Hafnarfirði og Kópavogi. Liðsmenn eru Atli Snær Ásmundsson bassi- og gítarleikari og söngvari, María Viktoría Einarsdóttir gítarleikari og söngvari, Svavar Níelsson gítar- og bassaleikari og Guðjón Trausti Skúlason trommuleikari. Þau eru 21 til 23 ára.

Kröstpönkbandið Þegiðu er víða að af Höfuðborgarsvæðinu skipað þeim Flemming Viðari Valmundssyni, sem syngur og leikur á harmóníku og handahófskennd ásláttarhljóðfæri, Tryggvi Þór Pétursson, sem leikur á gítar, Smári Nikulás Guðmundsson, sem leikur á saxófón og handahófskennd ásláttarhljóðfæri, Alexander Glói Pétursson, sem leikur á bassa, og Ögmundur Kárason, sem leikur á trommur. Þeir eru allir tvítugir nema Ögmundur, sem verður það brátt. Þeir spila framsækið indípönk.

Frá Egilsstöðum kemur Breki Steinn Mánason sem kallar sig Laser Life. Hann stýrir MIDI-borði og spilar á barítóngítar. Breki var áður gítarleikari í þungarokkhljómsveit en sneri sér síðan að raftónlist.

No Room For Another heitir síðrokkskvartett úr Reykjavík og Árborg. Sveitina skipa Tómas Guðmundsson sem syngur, Arnór Bragi Jóhannsson sem spilar á bassa og gítar og syngur, Guðmundur Einar Vilbergsson sem spilar á gítar og bassa og syngur og Kristján Gíslason sem vélar um hljóðgervil. Þeir eru á aldrinum 19 til 23 ára.

Félagarnir Markús og Birkir Bjarnasynir kalla sig Omotrack. Þeir eru úr Reykjavík og Markús, sem er 21 árs, spilar á píanó og syngur, og Birkir, sem er 19 ára, spilar líka á píanó og syngur. Nafn sveitarinnar völdu þeir þar sem þeir eru uppaldir í Eþíópíu.

Premium er úthverfablanda, samansett af ungmennum úr Árbæ og Breiðholti sem eru nítján til tuttugu ára. Sigurður Sverrisson leikur á gítar og syngur, Gunnar Ingi Jósepsson leikur á gítar, Kristján Pétur Jónssoná trommur og Benidikt Franklín Smárason á bassa. Þeir hafa allir gaman af þungarokki og einnig að spila það.

The Roulette er úr Reykjavík og af Selfossi. Sveitina skipa Skúli Gíslason trommuleikari, Gunnar Guðni Harðarson söngvari, Teitur Magnússon gítarleikari og Ævar Örn Sigurðsson bassaleikari. Sveitarmenn eru á aldrinum 24 til 26 ára og spila framsækið sýrurokk.

While My City Burns, sem ættuð er úr Kópavogi, Mosfellsbæ og Garðabæ, er með í músíktilraunum öðru sinni, en nokkuð breytt. Sveitina skipa Gauti Hreinsson söngvari, Guðjón Trausti Skúlason trommuleikari, Ríkharður Einarsson hljómborðsleikari, Alexander Glói Pétursson gítarleikari og söngvari, Axel Örn Torfason bassaleikari og Jón Gauti Samúelsson gítarleikari. Þeir félagar eru á aldrinum 20 til 21 árs gamlir og spila reiða tónlist með poppuðum viðlögum.