Víkingur vann Fjölni mjög naumlega, 27:26, í öðrum leik liðanna í umspili um keppnisrétt í Olís-deild karla í handknattleik í Dalhúsum í Grafarvogi í gærkvöldi. Fjölnismenn áttu síðustu sóknina og áttu þar með möguleika á að jafna metin. Margir Fjölnismenn telja sig hafa verið svikna um vítakast á síðustu sekúndu þegar einn leikmaður liðsins fór inn úr horninu og fellur við ásamt varnarmanni Víkingsliðsins. Dómarar leiksins dæmdu aukakast.