Það var glatt á hjalla í íþróttahúsinu í Mosfellsbæ síðdegis þegar Afturelding tryggði sér sæti í úrslitum Olís-deildar karla í handknattleik eftir framlengdan háspennuleik við ÍR-inga, 30:29. Árni Bragi Eyjólfsson skoraði sigurmark leiksins 13 sekúndum fyrir leikslok og fór vel á því en hann tryggði Aftureldingarliðinu framlengingu þegar hann skoraði á síðustu sekúndu venjulegs leiktíma með ævintýralegu marki, 25:25.