„Skemmtið ykkur vel og kaupiði sem mest“

INNLENT  | 26. ágúst | 16:15 
Verslun sænska tískurisans H&M opnaði með pompi og prakt í Smáralind í dag. Plötusnúður þeytti skífunum á meðan fjöldi fólks beið átekta eftir að komast inn í verslunina sem loks er komin til landsins

Verslun sænska tískurisans H&M opnaði með pompi og prakt í Smáralind í dag. Plötusnúður þeytti skífunum á meðan fjöldi fólks beið átekta eftir að komast inn í verslunina sem loks er komin til landsins. Starfsfólk verslunarinnar tók nokkur dansspor fyrir framan verslunina rétt áður en opnaði, venju samkvæmt, en alls standa 87 starfsmenn vaktina í dag.

Frétt mbl.is: Geislafræðingur stýrir verslun H&M

Þá afhendu yfirmenn verslunarkeðjunnar fyrstu þremur viðskiptavinunum gjafabréf að verðmæti 10.000 til 25.000 krónur áður en þeir loks klipptu á rauða borðann með formlegum hætti. „Skemmtið ykkur vel og kaupið sem mest,“ sögðu þær Vala Kristín Eiríksdóttir og Júlíana Sara Gunnarsdóttir, rétt áður en viðskiptavinir tóku að streyma inn í verslunina, en þær voru kynnar við opnunarathöfnina.

 

Attachment: "Opnun H&M" nr. 10361

 

„Við erum ánægðir að koma með þessa versl­un til Íslands. Við erum greini­lega með sterk­an viðskipta­vina­hóp, en með þessu fær­um við búðirn­ar nær þeim hóp. Aðgengi fyr­ir alla Íslend­inga er okk­ur mik­il­vægt,“ sagði Filip Ekvall, svæðisstjóri H&M í Noregi og á Íslandi, í samtali við mbl.is í morgun. Þá sagði Karl-Johan Persson, forstjóri H&M-samstæðunnar að til greina komi að opna fleiri verslanir úr röðum samstæðunnar hér á landi.

Frétt mbl.is: Skoða opnanir fleiri verslana á Íslandi

 

Mætt fyrsta daginn fyrir slysni og forvitni

„Ég er hérna bara fyrir slysni. Við erum að fara í brúðkaup á eftir og maður er að drepa tímann bara,“ segir Kjartan Gunnar Jónsson í samtali við mbl.is. Kjartan Gunnar er meðal fyrstu viðskiptavina H&M á Íslandi en hann kveðst hafa beðið í röðinni í um það bil klukkustund áður en honum var hleypt inn.

„Bara mjög vel, miðað við aðrar búðir þá finnst mér þetta mjög sanngjarnt bara,“ segir Kjartan spurður hvernig honum hugnast verðlagið í versluninni. Hann segir aldrei að vita nema að hann finni sér föt fyrir brúðkaupið í versluninni en hann hafði þegar fundið nokkrar flíkur sem honum leist vel á, bæði fyrir sig og mág sinn sem hann var að versla fyrir í leiðinni.

 

Jenný Jensdóttir beið einnig í um það bil klukkustund eftir að komast inn í verslunina og leist ágætlega á.

„Ég er bara hér fyrir forvitni. Ég bara kaupi ef ég sé eitthvað sem mér lýst á,“ segir Jenný sem kveðst ekki vera neinn sérstakur aðdáandi keðjunnar en hún hafi þó hingað til stundum verslað þar þegar hún er stödd á Spáni. Nú er þess ekki lengur þörf þegar verslunin er komin hingað til lands.

 

Þættir