„Þetta var mikill spennuleikur og okkur mjög erfiður. Sérstaklega í síðari hálfleik. Þá fundu menn að mikið var undir. En við náðum að snúa erfiðri stöðu upp í sigur á lokakaflanum og þar skoruðu þriðja flokks menn þrjú síðustu mörkin," sagði Konráð Olavsson, þjálfari Aftureldingar, eftir að liðið vann Selfoss, 25:23, í lokaumferð 1. deildar að Varmá í kvöld. Með sigrinum tryggði Afturelding sér sigur í deildinni og sæti í úrvalsdeildinni á næsta keppnistímabili.