„Við erum eiginlega komin í hálfgerð vandræði,“ segir Víkingur Heiðar Ólafsson, listrænn stjórnandi Reykjavík Midsummer Music, sem hefst á morgun. Hann óskaði eftir að fá 100 gamaldags taktmæla lánaða hjá þjóðinni, viðbrögðin voru slík að um 160 slíkir höfðu skilað sér í hús um hádegisbil í dag en þeir verða notaðir við flutning á verki Ligetis fyrir 100 taktmæla.

Þrátt fyrir að vera kominn með mun fleiri taktmæla en þörf er á á hann þó von á því að allir fái að vera með. Hann tekur það skýrt fram að vel sé hugsað um þá alla og mun þeim verða skilað til eigenda sinna að tónleikunum loknum.

Eins og áður sagði hefst hátíðin á morgun en hún er um margt óvenjuleg þar sem blandað er saman tónlistarflutningi á verkum sem aldrei hafa verið flutt hér á landi, kvikmyndasýningum og dagskrá á Volta þar sem Víkingur Heiðar mun koma fram ásamt DJ Terrordisco.    

Mbl.is leit inn í Hörpu í dag þar sem verið var að æfa verk eftir Bach fyrir kvintett og ræddi við Víking Heiðar um hátíðina.

Dagskrá hátíðarinnar er að finna hér.