Vefmiðlun ehf, sem rekur nokkur af vefsvæðum landsins, hefur ákveðið að halda áfram öllum netþjónum sínum hérlendis, þrátt fyrir flótta tæknifyrirtækja með netþjóna sína til útlanda að undanförnu. Það er mat stjórnar félagsins að standa beri vörð um þekkingu og færni hérlendis og gefa íslenskum netverjum áfram þann kost að skoða íslenskar vefsíður án sérstaks gjalds vegna niðurhald frá útlöndum. Þetta kemur fram í fréttatilkynningu frá Vefmiðlun.

Stjórn félagsins ítrekar hins vegar andstöðu sína við íhlutun ríkisins í rekstri sæstrengja og annarra gagnaveitna. Afskipti ríkisins af fjármögnun og rekstri Farice sæstrengsins hefur haft ráðandi áhrif á mikilvægar ákvarðanir sem hafa leitt til vandræðagangs fyrirtækisins í Skotlandi. Illa ígrunduð sparnaðarsjónarmið við lagningu landlínunnar hafa verið helsti orsakavaldur sambandsslita að undanförnu.

Stjórn Vefmiðlunar hvetur því þau fyrirtæki sem sérhæfa sig í samtengingu stórra netkerfa að kanna hvort ekki megi svara augljósri eftirspurn markaðarins eftir stöðugum og góðum tengingum við umheiminn, að því er fram kemur í fréttatilkynningu.