Nýjar vísbendingar um snjómanninn ógurlega

Breskir vísindamenn ætla að gera DNA-rannsóknir á dýrahárum sem talin eru vera af jeta, eða snjómanninum ógurlega eins og fyrirbærið hefur verið kallað.

Hárin fundust í Garo-hæðum á Indlandi, en apasérfræðingur sagði þau afar lík hárum sem Edmund Hillary fann á Everest-fjalli. Útilokað hefur verið að hárin séu af dýrum sem lifa á svæðinu.

Hárin gætu verið af svartgráu, þriggja metra háu dýri sem líkist apa, og rennt stoðum undir goðsögnina um jetann, sem fjöldi fólks segist hafa séð.