Einar Stefánsson fær verðlaun á sviði augnlækninga
Einar Stefánsson Brynjar Gauti
Einar Stefánsson prófessor við læknadeild Háskóla Íslands og yfirlæknir við augndeild Landspítalans fær svokölluð Jules Gonin verðlaun á þessu ári en þau eru ein merkustu verðlaun sem veitt eru í heiminum á sviði augnlæknisfræði, að því er segir í tilkynningu.
Jules Gonin verðlaunin eru veitt annað hvert ár þeim einstaklingum í heiminum sem þykja hafa staðið sig öðrum framar í augnrannsóknum og lækningum, sérstaklega á sviði sjónhimnusjúkdóma.
„Gobin-verðlaunin eru ekki veitt fyrir eitthvað tiltekið verkefni eða afrek heldur eru þau veitt einstaklingum sem þykja hafa lagt mikið til augnlækninga og augnrannsókna á ferli sínum.
Í þessu tilviki er að líkindum horft til rannsókna Einars Stefánssonar á sviði súrefnisefnaskipta augans og skýringum á því hvers vegna laser meðferð er hjálpleg í augnsjúkdómi í sykursýki og æðalokunum svo að dæmi séu tekin.
Nýlegar rannsóknir Einars Stefánssonar og Jóns Atla Benediktssonar, prófessors við rafmagns- og tölvuverkfræðideild Háskóla Íslands, hafa líklega einnig ráðið miklu um þessa niðurstöðu en þeir tveir hafa í félagi við aðra þróað súrefnismæli fyrir augnbotna sem hefur vakið mikla athygli á heimsvísu.
Augnlyfjaþróun Einars Stefánssonar og Þorsteins Loftssonar, prófessors í lyfjafræðideild HÍ , kemur þarna einnig án efa til , enda opnar sú þróun þeirra möguleika á nýrri og frumlegri meðferð við augnsjúkdómum , svo og rannsóknir Einars á forvörnum gegn blindu í sykursýki," samkvæmt tilkynningu.
Gonin-verðlaunin eru kennd við svissneska augnlækninn Jules Gonin sem umbylti meðferð við sjónhimnulosi á fyrri hluta síðustu aldar. Bandaríska stofnunin Retina Research Foundation veitir verðlaunin og styrk sem þeim fylgir í samræmi við tillögur Club Jules Gonin sem eru alþjóðleg samtök augnlækna og augnvísindamanna. Verðlaunin verða veitt 12. september n.k. í St. Moritz í Swiss.
