Japanskir vísindamenn hafa skýrt frá því að þeim hafi tekist að framleiða flensulyf sem virki gegn mörgum og ólíkum veirutegundum. Segja þeir að með þessu nýja lyfi megi koma í veg fyrir að fuglaflensan verði að faraldri í mönnum.

Nýja bóluefnið var reynt á músum sem mannlegum genum hafði verið komið fyrir í, og gaf það mjög góða raun. Þá kom líka í ljós að það virkaði þótt veirurnar stökkbreyttust.

Hingað til hafa flest flensulyf byggst á próteini, sem finnst á ytra borði veirunnar, en það stökkbreytist oft og þá hættir lyfið að virka. Japanska bóluefnið er hins vegar byggt á algengum próteinum inni í veirunni en þau eru nokkuð stöðug og breytast sjaldan. Var lyfið prófað á veirunum Soviet-A og Hong Kong-A og á H5N1, hinu banvæna afbrigði fuglaflensunnar. Segjast japönsku vísindamennirnir vissir um að lyfið muni virka gegn öðrum afbrigðum af síðastnefndu veirunni.

Á markað eftir nokkur ár

Tetsuya Uchida, vísindamaður hjá japönsku smitsjúkdómastofnuninni, segist búast við að það taki nokkur ár að koma nýja bóluefninu á markað en reyna verði það frekar á músum og líklega á stærri dýrum og jafnvel mönnum. Það voru vísindamenn frá mörgum japönskum háskólum og rannsóknastofnunum sem unnu að smíði bóluefnisins. svs@mbl.is