Eðlutegund sem kennd er við eyjuna Komodo á Indónesíu hrellir nú íbúa tveggja eyja í suðausturhluta Indónesíu. Eðlan, sem er stærsta eðla heims og í útrýmingarhættu, er sögð hafa tekið upp á því á undanförnum árum að ráðast á fólk.

Eðlan hefur tennur sem minna mest á hákarlatennur og er bit hennar svo eitrað að það dregur menn til dauða á nokkrum klukkutímum fái þeir ekki móteitur gegn því.

Vitað er til þess að tveir hafi látið lífið eftir slík bit á síðustu tveimur árum og nokkrir til viðbótar hafa hlotið alvarlega áverka. Íbúar eyjanna segja hins vegar ekki vera nema nokkur ár frá því að eðlurnar fóru að ráðast á menn.

„Ég hélt ég myndi ekki lifa það af… Ég hef varið helmingi ævi minnar í að vinna með Komodo-drekum en ég hef aldrei séð neitt þessu líkt,” segir þjóðgarðsvörðurinn Main um árás sem hann varð fyrir. „Til allrar hamingju heyrðu vinir mínir til mín og komu mér á sjúkrahús í tæka tíð.”

Komodo drekar geta orðið allt að 3 metrar á lengd og 70 kg og eru þeir mjög vinsælir í dýragörðum í Bandaríkjunum og Evrópu. Þeir eru rándýr sem lifa aðallega á dádýrum.

Eðlurnar finnast nú eingöngu villtar á eyjunum Komodo og Rinca en þær dóu út á þriðju eyjunni Padar á níunda áratug síðustu aldar.

Til er þjóðsaga á svæðinu sem hermir að menn og drekar séu afkomendur  tvíbura og að því hafi þeir lifað öldum saman í sátt og samlyndi.

„Þeir réðust aldrei á okkur þegar við gengum ein í skóginum og hafa aldrei ráðist á börnin okkar,” segir einn íbúanna. „Nú höfum við öll miklar áhyggjur af þessu.”

Þá segir hann íbúana telja að bann við því að fólk fæði drekana hafi gert það að verkum að þeir séu nú hungraðri og því árásargjarnari en áður. Sérfræðingar segja það hins vegar vera dýrunum fyrir bestu að veiða sér til matar og viðhalda þannig hæfni sinni til að sjá um sig sjálf.