Ægilega hollt. mbl.is/Ómar

Grænmetisætur eru ólíklegri til að fá ýmsar tegundir af krabbameini en þeir sem leggja sér kjöt til munns. Þetta á þó ekki við um allar tegundir krabbameins, til dæmis ekki krabbamein í meltingarfærum. Er þetta meðal niðurstaða rannsókna breskra og ný-sjálenskra háskóla á 61,566 konum og körlum.

Frá þessu segir á vef BBC.

Samkvæmt rannsókninni fær þriðjungur alls fólks krabbamein einhvern tíma á lífsleiðinni. Meðal grænmetisæta er hlutfallið aðeins 29%. Munurinn var mismikill eftir tegundum krabbameina.

Hjá þeim grænmetisætum sem borða fisk var tíðni krabbameins ekki eins mikið lægri og hjá algerum grænmetisætum. Rannsakendurnir sögðu ástæður þessar ekki ljósar en mögulegt væri að grænmeti veiti sérstaka vörn gegn sjúkdóminum.

Magakrabbamein var um þrefalt líklegra hjá þeim sem neyta kjötmetis en það er ekki óvænt að sögn vísindamannanna þar sem unnar kjötvörur séu taldar tengjast krabbameini í maga. Krabbamein í ristli og endaþarmi var örlítið algengara hjá grænmetisætum en sá munur þótti ekki afgerandi. Þá reyndist krabbamein í hálsi tvöfalt tíðara hjá grænmetisætum.

Tim Kay, aðalsprautan í rannsókninni, segir að ekki megi draga stórar ályktanir af rannsókninni einni og sér. „Í augnablikinu eru þessar niðurstöður ekki nógu afgerandi til að mæla með mjög miklum breytingum í mataræði fólks.“