Vísindamenn telja að konur séu af náttúrunnar hendi veikari en karlar í baráttunni við HIV veiruna. Það er vel þekkt að HIV vex hraðar í konum heldur en í körlum með svipað magn af veirunni í blóðinu.

Nú hefur bandarískt rannsóknateymi við Massachusetts General Hospital fundið ónæmisfrumu sem bregst ólíkt við milli kynjanna þegar veiran berst í líkamann. Niðurstöðurnar hafa verið birtar í Nature Medicine, og gætu leitt til nýrra leiða til að meðhöndla HIV og hægja á eða stöðva þróunina yfir í alnæmi.

Vísindamennirnir rannsökuðu sérstaklega ónæmisfrumur sem eru meðal þeirra fyrstu í líkamanum til að bera kennsl á og berjast gegn HIV veirunni. Í ljós kom að hærra hlutfall slíkra fruma úr heilbrigðum, ósmituðum konum, urðu virkar þegar þær komust í snertingu við HIV-1 afbrigði veirunnar, heldur en hjá körlum.

Því næst könnuðu þeir hvort hormónamagn kvennanna hefði áhrif og komust að því að konur sem komnar voru af breytingaskeiði sýndu svipuð viðbrögð og karlar.

„Þrátt fyrir að sterkari viðbrögð ónæmiskerfisins geti verið kostur fyrst eftir að smit kemur upp, þar sem veiran fjölgar sér hægar, þá getur stöðug og ítrekuð fjölgun veirunnar og með henni, stöðugt áreiti á ónæmiskerfið, geti leitt til þessarar hraðari þróunar alnæmis sem við höfum séð í konum,“  sagði Dr. Marcus Altfeld við fréttastofu BBC.

Lyf sem stýra þessum viðbrögðum ónæmiskerfisins gætu hjálpað sjúklingum með HIV smit, að sögn Altfeld. Teymið hans hefur þegar hafist handa við að kanna þetta.