Frá afhendingu viðurkenningarinnar. Frá vinstri: Doug Kennedy, aðstoðarforstjóri viðskiptalausna Microsoft, Carsten Wulff, umsjónarmaður samstarfsaðila LS Retail, Gunnar Björn Gunnarsson, framkvæmdastjóri LS Retail, Cesar Cernuda, einn aðalstjórnenda Microsoft International, og Sveinn Áki Lúðvíksson, sölustjóri LS Retail.

Íslenska upplýsingatæknifyrirtækið LS Retail var útnefnt hugbúnaðarframleiðandi ársins í Vestur-Evrópu á Microsoft World Wide Partner ráðstefnunni í New Orleans í liðinni viku. LS Retail komst einnig annað árið í röð í hinn svokallaða „Inner circle“ Microsoft-samstarfsaðila í viðskiptalausnum, en einungis allra bestu samstarfsaðilar Microsoft á alþjóðavísu fá inngöngu í þann hóp eða um 1%.
 
Í ræðu sinni við útnefninguna sagði Cesar Cernuda, einn af aðalstjórnendum Microsoft International, að LS Retail væri frábært dæmi um farsælan samstarfsaðila sem einbeitti sér að ákveðnum geira og hefði náð að bæta við sig yfir 200 viðskiptavinum í smásölugeiranum á síðastliðnu ári. Fyrirtækið hefði þróað lausnir fyrir smásölugeirann í Microsoft Dynamics NAV og Microsoft Dynamics AX og nú væru lausnir þess uppsettar í 132 löndum og þýddar á 33 tungumál.
 
Meðal lykilatriða sem horft var til við útnefninguna voru framúrskarandi árangur í sölu, afbragðsgóð sérfræðiþekking á vörum og þjónustu Microsoft Dynamics og mikil ánægja viðskiptavina.
 
„Í samstarfsneti Microsoft eru yfir eitt þúsund hugbúnaðarframleiðendur í Evrópu og um allan heim. LS Retail tilheyrir þessum hópi og við fögnum því mjög að Microsoft skuli velja fyrirtækið sem hugbúnaðarframleiðanda ársins. Viðurkenningin er árangur af þrotlausri vinnu og ríkri áherslu á vörugæði. Hluta af velgengni LS Retail má einnig rekja til öflugs samstarfsaðilanets Microsoft en fyrirtækið hefur aflað 216 nýrra viðskiptavina á síðustu tólf mánuðum. LS Retail hefur sett sér mjög metnaðarfull markmið fyrir næstu átján mánuði og hyggst styrkja enn stöðu sína sem leiðandi söluaðili á viðskiptalausnum frá Microsoft Dynamics,“ segir Gunnar Björn Gunnarsson, framkvæmdastjóri LS Retail.
 
„Þessi árangur LS Retail er athygliverður sér í lagi ef litið er á að víðast hver er samdráttur í heiminum. Fyrirtækið skarar framúr á sínu sérsviði og ljóst að viðskiptavinir velja lausn þeirra sem svar við kröfu um hagræðingu í rekstri almennt. Verðlaunin eru eftirsóknarverð og árangurinn einungis á valdi hugbúnaðarframleiðenda sem eru á heimsmælikvarða. Það er sérstaklega ánægjulegt að íslenskt fyrirtæki skuli ná svona afburða árangri,“ segir Halldór Jörgensson, framkvæmdastjóri Microsoft Íslandi.