Iðnir tölvunotendur á internetkaffi í Yingtan í Jiangxi héraði í Kína. Reuters

Netnotendur í Kína eru nú orðnir fleiri talsins en öll Bandaríska þjóðin, eftir að þeir urðu 388 milljónir við enda júnímánaðar, samkvæmt yfirvöldum. Bandaríkjamenn eru um 307 milljónir talsins. Virkum netnotkendum í Kína fjölgaði um 40 milljónir á fyrstu sex mánuðum ársins og fjöldi nettenginga fór úr 10 milljónum í 93,5 miljónir á sama tímabili. 

Í byrjun júnímánaðar voru alls um 95% allra bæjarfélaga í Kína með internettengingu og 92,5% þorpa hafði símalínu sem hægt er að nota líka til að komast á internetið, segja opinberar tölur í Kína.

Búist er við því að nettengingar í sveitahéruðum landsins muni taka miklum framförum á næstunni þar sem stærstu Fjarskiptafyrirtæki landsins, China Telecom, China Mobile og China Unicom hyggjast fjárfesta alls 280 milljörðum yuan (40 milljörðum döllara) í landlægu 3G kerfi næsta árið. 

Þessi hraða þróun í átt að aukinni internetnotkun hefur gefið Kínverjum nýjan vettvang til að tjá sig með hætti sem er sjaldséður í hinu stranga, ríkisrekna fjölmiðlaumhverfi Kína. Vaxandi styrkur netsins hefur valdið yfirvöldum í Peking nokkrum áhyggjum vegna möguleikans á vaxandi óróa í samfélaginu, og hafa yfirvöld því hert enn tökin á netnotkun þjóðarinnar.

Sem dæmi má nefna að í kjölfar óeirða fyrr í þessum mánuði í norðvesturhéraðinu Xinjiang lokaði ríkisstjórnin á internetaðgang á nánast öllu svæðinu og er þetta ein umfangsmesta netlokun í Kína hingað til.

Kínversk yfirvöld hafa sem sem kunnugt er einnig lokað aðgangi að samskiptasíðunum Twitter og Facebook sem og myndskeiðasíðunni YouTube auk fjölda fleiri síðna sem notaðar eru til að skiptast á skoðunum og deila efni.