Börn sem alast upp við ást og aga farnast best í lífinu. Greinilegur munur er á börnum sem eiga ástríka og ákveðna foreldra og börnum sem alast upp við mikið frjálsræði eða afskiptaleysi. Þetta er niðurstaða rannsóknar sem byggir upplýsingum frá 9.000 breskum fjölskyldum.

Sagt er frá rannsóknunum á vef BBC. Að mati skýrsluhöfunda eru börn sem alast upp við ást og aga tvöfalt líklegri til að sýna félagslegan þroska og jákvæð persónueinkenni en börn sem búa við annars konar uppeldi.

Haft er eftir einum skýrsluhöfunda að traust, hlýja og agi þar sem foreldrar eru samkvæmir sjálfum sér sé það sem skipti máli.

Börn sem bjuggu við ástúð og aga í uppeldi voru líklegri til að þróa með sér hæfileikar eins og einbeitingu, sjálfstjórn og samúð. Þessir hæfileikar eru allir taldir ráða miklu um hvernig börnum farnast síðar í lífinu, en persónueinkenni af þessu tagi þróar einstaklingurinn með sér frá unga aldri.

Í skýrslunni kom fram að börn frá ríkum heimilum voru tvisvar sinnum líklegri að þróa með sér þessa jákvæðu kosti en börn frá fátækum heimilum. Sama á við með börn sem eiga gifta foreldra í samanburði við börn sem alast upp hjá einstæðu foreldri eða stjúpforeldrum.

En þegar eingöngu var litið til þess hvaða aðferðum foreldrar beittu í uppeldi sínu hvarf þessi munur. Þá skipti ekki máli hvort börn komu frá ríkum eða fátækum heimilum eða hvort foreldrarnir bjuggu saman eða ekki.

Skýrslan sýnir að áhrif frá foreldrum er sá þáttur sem ræður mestu um velferð barnanna. Aðrir þættir sem skipta máli þegar reynt er að meta hvernig börnum farnast er menntun foreldra og brjóstagjöf. Niðurstaða skýrslunnar er því sú að öllum máli skipti hversu góðir foreldrar eru í uppeldishlutverki sínu.