Microsoft í Bandaríkjunum hefur veitt íslenska hugbúnaðarfyrirtækinu TM Software , dótturfélagi Nýherja, viðurkenningu sem mikilvægasti samstarfsaðili þess í tæknilausnum í almannaöryggi, að því er segir í fréttatilkynningu.

Magnús Ingi Stefánsson hjá TM Software tók við viðurkenningunni á ráðstefnu um almannaöryggi sem haldin var í höfuðstöðvum Microsoft í Redmond í Bandaríkjunum. Viðurkenningin er veitt TM Software fyrir upplýsingavefgátt sem félagið hefur þróað fyrir Sameinuðu þjóðirnar í samvinnu við Microsoft. Vefgáttin, sem nefnist oneresponse.info, er notuð til þess að samræma hjálparstarf, neyðaraðstoð og þróunarstarf á vegum Sameinuðu þjóðanna og samstarfsaðila. Lausnin var meðal annars notuð af heilbrigðisyfirvöldum í Mexíkó í kjölfar útbreiðslu H1N1 veirunnar á síðasta ári og við samræmingu á hjálparstarfi vegna jarðskjálfta á Haíti í upphafi ársins.

Gísli Ólafsson, tæknilegur ráðgjafi hjá Microsoft Corporation, sem jafnframt er í alþjóðlegu neyðaraðstoðarteymi Microsoft, segir að TM Software hafi á síðustu árum unnið náið með Microsoft við að aðstoða stjórnvöld og alþjóðastofnanir víða um heim við að samhæfa viðbrögð við náttúruhamförum og farsóttum með aðstoð upplýsingatækni.

„TM Software hefur mikla þekkingu í uppsetningu á slíkum samskiptalausnum og vakið athygli fyrir öguð vinnubrögð og fagmennsku í sínum störfum. Það er því mikill heiður að veita TM Software slíka viðurkenningu sem þakklæti fyrir þeirra óeigingjarna starf," segir Gísli í tilkynningu TM Software