BrainPort tækið gerir kleift að átta sig á lögun hluta og að lesa með tungunni. http://vision.wicab.com/technology/

Ný tækni hefur gert Craig Lundberg, 24 ára breskum fyrrum hermanni, kleift að „sjá“ með tungunni. Lundberg missti sjónina í sprengjuárás í Írak. Hann getur nú lesið, áttað sig á útliti hluta og gengið um án aðstoðar með hjálp tækisins sem fundið var upp í Bandaríkjunum.

Talið er að þessi nýjung, tunguskjárinn, geti gjörbylt lífi margra sem nú njóta þess ekki að hafa sjón á augum. Lundberg er frá Liverpool í norðvestur Englandi. Hann tapaði allri sjón á báðum augum þegar hann varð fyrir sprengju á meðan hann gegndi herþjónustu í Basra í Írak 2007.

Lundberg hafði búið sig undir að ganga í gegnum lífið, það sem eftir er, með aðstoð blindrahunds. Breska varnarmálaráðuneytið valdi hann, fyrstan Breta, til að prófa tækið BrainPort. Tækið  breytir myndum í rafbylgjur sem sendar eru til tungunnar. Þar valda þeir eins konar kitlandi tilfinningu á yfirborði tungunnar.

Notendur tækisins geta lært að túlka rafboð tækisins þannig að þeir átti sig á lögun hlutanna sem augum tækisins er beint að. Búnaðurinn samanstendur af lítilli myndavél sem fest er á sólgleraugu. Hún er tengd við flögu sem notandinn leggur á tunguna til að lesa rafboðin. 

Heimasíða BrainPort