Íslendingar verða almennt langlífir; allar rannsóknir staðfesta það. mbl.is/Kristinn

Dánartíðni karlmanna undir sextugu er lægst hér á landi, samkvæmt nýrri könnun, sem bandarískir vísindamenn hafa gert. Sýnir tölfræðin, að 65 karlmenn af hverjum 1000 á Íslandi látast fyrir sextugt. Í Swasilandi, þar sem dánartíðnin er hæst, látast að jafnaði 765 karlar af hverjum 1000 fyrir sextugt.

Dánartíðni fólks undir sextugu hefur lækkað mikið á undanförnum fjórum áratugum eða um 34% að jafnaði hjá konum og 19% hjá karlmönnum. Lífslíkurnar eru hins vegar mjög mismunandi eftir því hvar fólk býr. Rannsóknin, sem gerð var á vegum Washingtonháskóla í Seattle og birt er í breska læknablaðinu The Lancet, sýnir, að 15 ára stúlka í Sambíu er 16 sinnum líklegri til að deyja fyrir sextugt en jafngömul stúlka á Kýpur.  

Með öðrum orðum má búast við því, að af hverjum 1000 ungum konum í Sambíu megi búast við að 400 nái því að verða sextugar.  

Þá leiðir rannsóknin í ljós, að dánartíðni í allri sunnanverðri Afríku er á þessu ári hærri en hún var í Svíþjóð árið 1751, nærri tveimur öldum áður en pensillín kom til sögunnar.

Þótt verulega hafi dregið úr dánartíðni fólks undir sextugu frá árinu 1970 fjölgaði dauðsföllum í þessum aldursflokki mikið á tveimur svæðum á jörðinni undir lok síðustu aldar en af mismunandi ástæðum. 

Á svæðinu sunnan Saharaeyðimerkurinnar í Afríku stafaði hækkandi dánartíðni aðallega af mikilli útbreiðslu alnæmis en um 1,5 milljónir manna láta lífið af völdum þess sjúkdóms árlega á þessu svæði.

Á sama tímabili hækkaði dánartíðnin verulega í Austur-Evrópu í kjölfar falls Sovétríkjanna árið 1991.  

Fram kemur í rannsókninni, sem byggði m.a. á manntölum og skráningu dauðsfalla, að þau fimm lönd þar sem dánartíðni karlmanna undir sextugu er minnst eru Ísland, Svíþjóð, Malta, Holland og Sviss. 

Löndin fimm þar sem dánartíðni kvenna á þessum aldri er minnst eru Kýpur, Suður-Kórea, Japan, Grikkland, Ítalía og Spánn.  

Stofnun Bill og Melindu Gates fjármagnaði rannsóknina.