Reikniskekkja í iPhone 4

Forsvarsmenn Apple segjast vera steini lostnir yfir því að reikniformúla í iPhone 4, sem reiknar út styrk loftnets símans, skuli ekki vera rétt. Fyrirtækið hefur lofað því að gefa út ókeypis hugbúnaðarviðbót til að leysa málið. Nú þegar hafa mál verið höfðuð gegn fyrirtækinu vegna gallans.

Apple hefur sent eigendum nýjasta iPhone símans bréf þar sem fram kemur að vegna rangrar reikniformúlu þá gefi síminn til kynna að sambandið sé mun meira en það sé í raun og veru. Á sumum stöðum sýni síminn fjórar eða fimm stikur á stöðum þar sem sambandið er í raun lélegt.

Þá segir fyrirtækið að notendur geti skilað símtækjunum innan 30 daga og fengið þau endurgreidd.

Apple neitar því að sjálft loftnet símans, sem er í sjálfri umgjörðinni, sé gallað. En margir notendur og sérfræðingar hafa haldið því fram.

Sumir hafa kvartað undan því að með því að halda utan um neðri hluta símans, nánar tiltekið um vinstra hornið, þá missi síminn sambandið. 

iPhone 4 var settur í sölu í síðustu viku og hefur selst í bílförmum.

• 2 blogg um fréttina

Bloggað um fréttina

• iPhoneHjálp: Kæru blaðamenn mbl, reynið að kynna ykkur allar hliðar áður …
• Steini Thorst: Vinstra hornið...