Farsímar verða sífellt fullkomnari handtölvur. Með því eykst hættan á að tölvuþrjótar brjótist inn í símana. Reuters

Sérfræðingar í öryggisvörnum fyrir hugbúnað vara við því að farsímanotendur bjóði hættunni heim með uppsetningu allskyns forrita í síma, sem aftur eru fullir af viðkvæmum upplýsingum.

Ráðstefna um öryggisvarnir og tölvubúnað fer nú fram í bandarísku borginni Las Vegas. Samkvæmt frétt frönsku fréttaveitunnar AFP er heitasta umræðuefnið öryggismál farsímanotenda.

Farsímar hafa verið þróaðir í átt að litlum tölvum sem m.a. eru notaðir til að sinna bankaviðskiptum og til að geyma viðkvæmar upplýsingar, s.s. ýmis lykilorð og símanúmer, auk þess sem þeir gefa upp staðsetningu viðkomandi notanda. Slíkar upplýsingar eru afar verðmætar tölvuþrjótum.

Undarleg virkni hugbúnaðar

Í kjölfar þess að bandaríski tölvurisinn Apple gerði notendum kleift að hala niður og setja upp alls kyns hugbúnað á iPhone-símann hefur mikið æði gripið um sig í þeim geira, þ.e. gerð lítilla forrita fyrir farsíma. Farsímanotendur eru svo afar ómeðvitaðir um hættuna sem slíkum hugbúnaði getur fylgt.

Öryggisfyrirtækið Lookout kannaði um þrjú hundruð þúsund forrit fyrir farsíma og komst að því að virkni þeirra getur verið hreint út sagt undarleg. Til að mynda sendi hugbúnaður notaður til að skipta um skjámyndir á farsíma símanúmer úr símanum yfir netið til kínversks hugbúnaðarfyrirtækis. Tilgangurinn var alls óþekktur.

Mikil hætta í nánustu framtíð

Í öðru tilviki braust tölvuþrjótur inn í tölvuleik sem var til sölu og ætlaður farsímum, kom fyrir vírus í honum og dreifði frítt á netinu. Allmargir töldu sig vera með upprunalegu útgáfuna en áttuðu sig ekki á því, að einu sinni í mánuði hringdi síminn í átta símanúmer. Símtölunum var ekki svarað heldur færðust tólf dollarar á símareikning viðkomandi, og runnu fjármunirnir til tölvuþrjótsins. Auðséð er, að slíkt getur skapað tölvuþrjótum gríðarlega háar fjárhæðir.

Á ráðstefnunni telja málsmetandi menn í öryggisfræðum, að sjálfvirk úthringing síma í gjaldnúmer verði helsti vandi farsímaeigenda í nánustu framtíð. Tölvuþrjótar hafi áttað sig á því að auðveldara er að lauma sýktum hugbúnaði inn í símana en tölvur.

Notendur þurfa því að vara sig á því hvaða hugbúnað þeir setja upp.