Pirate Bay í Norður-Kóreu?

Norður-Kórea ber þess merki að þar hafa orðið kynslóðaskipti í æðstu röðum þótt eftir eigi að koma í ljós hver áhrifin verði á lífskjör almennra borgara. Gestkvæmt hefur verið hjá leiðtoganum Kim Jong-Un og fregnir herma að nýjustu gestirnir séu forsvarsmenn skráardreifingarsíðunnar Pirate Bay. 

Körfuboltastjarnan Dennis Rodman er nýfarin heim eftir Norður-Kóreureisu eins og frægt er orðið og í janúar bauð Kim til sín stjórnarformanni Google, Eric Schmidt. Tjáði hann yfirvöldum Norður-Kóreu þá skoðun sína að einræðisríkið myndi ekki komast áfram á þróunarbrautinni fyrr en netfrelsi yrði komið á í landinu.

„Landið er að opnast“

Á vefsíðunni Pirate Bay, sem sparkað var út úr Svíþjóð í síðustu viku, var í dag tilkynnt að síðan hefði sótt um „sýndarverulegt hæli“ í Norður-Kóreu í boði Kim Jong-Un. „Við getum í dag afhjúpað að við höfum fengið boð frá leiðtoga lýðveldisins Kóreu um að halda baráttunni áfram á netinu frá þeim,“ segir í yfirlýsingunni sem birt er ásamt mynd af merki Pirate Bay, sjóræningjaskipinu, í norðurkóresku fánalitunum.

„Landið er að opnast og eitt er víst; þeir hafa ekki áhyggjur af hótunum eins og aðrir,“ segir enn fremur á Pirate Bay og látið í veðri vaka að yfirlýsingin sé send út frá Pyongyang.

Margir telja að um grín sé að ræða en tæknibloggsíðan North Korea Teck segir að þegar umferð sé rakin frá PC-tölvu til Pirate Bay virðist sem þráðurinn liggi um netþjón í Norður-Kóreu en þar týnist slóðin. Tæknisíðan Torrent/Freak segir sömuleiðis að svo virðist sem efnið komi frá Norður-Kóreu en þar telja menn að um yfirvarp sé að ræða til að fela hvar síðan sé nú raunverulega hýst.

Fáir útvaldir hafa aðgang í Norður-Kóreu

Pirate Bay-síðan var stofnuð árið 2003 og hefur yfir 30 milljón notendur, m.a. marga á Íslandi. Í gegnum hana er hægt að deila og sækja höfundarréttarvarið efni s.s. tónlist og kvikmyndir og komast þannig hjá því að greiða fyrir efnið. Síðan var hýst í Svíþjóð undanfarin þrjú ár en var sparkað þaðan fyrir stuttu og var þá talið að leitað yrði á náðir Noregs eða Spánar eftir hýsingu.

Innra neti Norður-Kóreu var komið á fót árið 2008 en það tengist ekki internetinu. Afar fáir notendur hafa aðgang að innra netinu og geta þeir að sögn Afp aðeins skipst á upplýsingum sem hafa verið samþykktar af ríkinu.

Aðeins æðstu menn Norður-Kóreu eru taldir hafa aðgang að internetinu og er talið að um sé að ræða örfá hundruð eða í mesta lagi þúsund manns.