Enn breytist útlit Facebook

Notendur samfélagsvefsins vinsæla Facebook munu á næstu dögum taka eftir töluverðum breytingum á aðalsíðu sinni. Í stað hinnar hefðbundnu fréttaveitu mun einskonar dagblaðsútlit ryðja sér til rúms. Miðað við viðbrögð við öðrum breytingum má búast við fjölda kvartana vegna þessa.

Einhverjir notendur hafa þegar fengið nýja viðmótið en aðrir gætu þurft að bíða enn um sinn, jafnvel einhverjar vikur.

Samkvæmt því sem Mark Zuckerberg, forstjóri Facebook, sagði á blaðamannafundi í dag verður forsíða í stað fréttaveitunnar og hægt að velja helstu fréttir eða tiltekna dálka til að skoða. Að sjálfsögðu mun Facebook sjá um að sníða þá að hverjum notanda.