Greina krabbamein með öndunarmæli
Einfaldur öndunarmælir getur greint magakrabbamein, samkvæmt niðurstöðu nýrrar rannsóknar sem sagt er frá á vef BBC.
Vísindamenn frá Ísrael og Kína hafa komist að því að öndunarprófið gat greint magakrabbamein rétt í 90% tilvika og gat greint á milli krabbameins í maga og annarra meina í því líffæri. Um 130 einstaklingar tóku þátt í rannsókninni.
Niðurstöður rannsóknarinnar voru birtar í British Journal of Cancer og þar kemur fram að prófið gæti gjörbreytt og hraðað mjög ferli við greiningu á krabbameini.
Á hverju ári greinist magakrabbamein hjá um 7.000 Bretum. Í flestum tilvikum hefur fólk lengi haft krabbameinið áður en það greinist með sjúkdóminn.
Krabbamein í maga er greint með því að taka sýni innan úr magavegg. Nýja prófið greinir efni í andardrætti sem eru einstök fyrir þá sem hafa magakrabbamein.
Aðferðin við prófunina er ekki ný því margir vísindamenn hafa verið að vinna að því að þróa greiningu á krabbameini með þessum hætti. M.a. er unnið að því að þróa aðferð við að greina lungnakrabbamein sem og fleiri krabbamein.
