Svar: Með því að æfa sig

Íslenskur vísindamaður hefur komist að þeirri niðurstöðu ásamt norskum starfsbræðrum sínum að ekkert sé hæft í því að erfðafræðilegar ástæður útskýri hvers vegna sumir eru góðir í stærðfræði. Þeir segja einfaldlega að æfingin skapi meistarann. 

Vísindamenn við Tækniháskólann í Þrándheimi í Noregi segja að vilji maður ná árangri og bæta stærðfræðikunnáttu sína, þá verður viðkomandi að leggja hart að sér. Menn geti ekki treyst á að þeir búi einfaldlega yfir einhverskonar náttúrulegum stærðfræðihæfileikum.

Meðal þeirra vísindamanna sem unnu að gerð rannsóknarinnar er Hermundur Sigmundsson, sem er prófessor í lífeðlislegri sálarfræði við háskólann.

Niðurstaða vísindamannanna er þvert á þá almennu hugmynd sá sem er góður í stærðfræði hljóti að hafa fengið þá náðargáfu í vöggugjöf. Þetta kemur fram á vef United Press International.

Bent er á að sú niðurstaða að stærðfræði snúist um kunnáttu sem menn þrói með sér en sé ekki meðfæddur hæfileiki gæti haft áhrif á það hvernig kenna eigi stærðfræði. 

Vísindamennirnir könnuðu stærðfræðikunnáttu 70 barna í Noregi sem voru öll í fimmta bekk í grunnskóla. 

„Þú verður góður nákvæmlega í því sem þú æfir,“ segir Hermundur í samtali við UPI, og hann bætir við að þetta sé tilgáta sem vísindamennirnir hafi lagt fram og séu studd rökum. 

Hann segir ennfremur, að niðurstaðan styðji við nýjar hugmyndir í taugafræði. „Ákveðnar taugafræðilegar tengingar myndast með æfingu,“ segir hann. 

Niðurstöður rannsóknarinnar hafa verið birtar í vísindaritinu Psychological Reports.

• 1 blogg um fréttina

Bloggað um fréttina

• Ómar Ragnarsson: Hugarreikningur er þroskandi og nytsamlegur, en vanmetinn.