Úrúgvæski prófessorinn Gabriel Baldi Lemonnier er að rugga bátnum þegar kemur að skákíþróttinni. Hann hefur þróað nýja útgáfu þar sem allt að fjórir spilarar geta teflt í einu. Lemonnier hefur tryggt sér einkaleyfi á útgáfu sinni um víða veröld og nýtur hún vaxandi vinsælda.
Tvö ár eru síðan Lemonnier setti útgáfu sína, Four Fronts, á markað í Úrúgvæ en nú er spilinu einnig dreift í Bandaríkjunum, Púerto Ríkó og á Spáni. Lemonnier, sem er sprenglærður í skákfræðum, bjó í meira en tvo áratugi í Bandaríkjunum þar sem hann kenndi skák. „Þá flaug mér allt í einu í hug að athuga hvort ekki væri hægt að fjölga spilurum,“ segir Lemonnier sem einhenti sér í að skoða alls kyns breytur í skákinni.
Varð úr að hann bætti við einum taflmanni, prinsinum, sem bætist við hina sem fyrir eru; kónginn, hrókinn, drottninguna, peðið, riddarann og biskupinn. Lemonnier segir að prinsinn sameini krafta biskupsins og hróksins.
Þá eru taflmennirnir ekki aðeins svartir og hvítir eins og tíðkast heldur einnig gulir og rauðir.