Tónlistarmenn lifa 25 árum skemur en aðrir

Það hefur löngum verið sagt að poppstjörnur lifi lífinu hratt og deyi ungar. Nú hefur verið birt ný áströlsk rannsókn sem bendir til þess að bandarískir tónlistarmenn lifi sem nemur 25 árum skemur en aðrir Bandaríkjamenn.

Dianna Kenny, sem stýrir rannsókninni sem var gerð hjá háskólanum í Sydney, segir að það sé greinilegt að ekki er allt með felldu þegar kemur að lífslíkum tónlistarfólks. Rannsóknin náði til 12.665 karlkyns tónlistarmanna í Bandaríkjunum sem létust frá árinu 1950 þar til í júní á þessu ári. 

Rannsóknin bendir til þess að fimm til tíu sinnum meiri líkur séu á því að poppstjörnur deyi af slysförum en aðrir og sjálfsvíg eru einnig mun algengari meðal þeirra en annarra Bandaríkjamanna.

Eins er átta sinnum líklegra að tónlistarfólk sé myrt en annað fólk. Þegar allt er tekið saman kemur í ljós að tónlistarfólk lifir 25 árum skemur en aðrir að meðaltali.

Samkvæmt rannsókninni létust karlkynstónlistarmenn yfirleitt á aldrinum 55-60 ára en að meðaltali lifa bandarískir karlar í 75 ár. Bandarískar tónlistarkonur deyja yfirleitt rúmlega sextugar en aðrar bandarískar konur lifa að meðaltali í rúm 80 ár.

Í rannsókn sem unnin var af Tækniháskólanum í Queensland árið 2011 var hrakin sú fullyrðing sem víða hafði heyrst- 27 Club - þar sem líferni poppstjarna valdi því að þær lúta í lægra haldi fyrir manninum með ljáinn 27 ára að aldri. En í rannsókninni var hins vegar aðeins horft til tónlistarmanna sem höfðu náð fyrsta sæti á breska plötulistanum á tímabilinu 1956 til 2007.