Lögreglan á Íslandi er nú að vinna í því að innleiða spjaldtölvur í starf sitt, sem hægt verður að nota til þess að sekta ökumenn með minni fyrirhöfn. Frá þessu er greint á vefsíðunni Lapparinn.com.
Mun lögreglan nota spjaldtölvu af gerðinni HP ElitePad með Windows 8.1 stýrikerfinu. Sérhannað forrit frá danska fyrirtækinu Bluefragments mun síðan aðstoða lögregluna í störfum sínum.
Danska vefsíðan Mobilsiden.dk sem fyrst greinir frá fréttinni, hefur eftir Jónasi Inga Péturssyni, starfsmanni tæknideildar lögreglunnar, að eftir að innleiðingin hefur átt sér stað, muni taka um 5-10 mínútur að skrifa hverja sekt. Í dag tekur það lögreglumann 15-20 mínútur á vettvangi, auk þess sem skrá þarf sektina inn í kerfið síðar, og það tekur aðrar 15-20 mínútur.