Verða í geimnum í heilt ár

Geimfararnir Scott Kelly, sem er bandarískur, og Mikhaíl Korníenkó, sem er frá Rússlandi, munu innan fárra klukkustunda halda út í geim þar sem þeir ætla að dvelja í alþjóðlegu geimstöðinni í heilt ár. Þetta markar tímamót því enginn hefur dvalið svo lengi í stöðinni, sem er í um 400 km hæð yfir jörðu.

Vísindamenn vona að leiðangurinn muni veita þeim betri upplýsingar um hvaða áhrif þyngdarleysi hefur á mannslíkamann í þetta langan tíma.

Fjallað er um málið á vef breska ríkisútvarpsins.

Geimferðastofnarnir Bandaríkjanna og Rússlands segja að um ómetanlegar upplýsingar sé að ræða, en verkefnið tengist undribúningi að mönnuðum geimferðum til Mars -  sem menn binda vonir við að verði í framtíðinni hægt að leggja í. 

Kelly og Korníenkó munu leggja af stað í rússneskri Soyuz-eldflaug frá Baikonur í Kasakstan kl. 19:42 í kvöld að íslenskum tíma, eða kl. 01:42 í nótt að staðartíma. 

Rússneski geimfarinn Gennadí Padalka flýgur með þeim, en hann mun hins vegar aðeins vera hálft ár í stöðinni. 

Talið er að geimfarið muni tengjast geimstöðinni um sex tímum eftir flugtak. 

Þrátt fyrir að þeir Kelly og Korníenkó muni setja met í alþjóðlegu geimstöðinni, þá hafa geimfarar dvalið lengur í rússnesku Mír-geimstöðinni. Geimfarinn Valerí Pojakov dvaldi um borð í stöðinni í hvorki fleiri né færri en 437,7 daga á milli áranna 1994 og 1995.

Korníenkó bendir hins vegar á að mikil þróun og framfarir í tækni og vísindum hafi átt sér stað sl. tvo áratugi. „Nú ætlum við að láta reyna á það hvernig maðurinn getur starfað í svo löngum ferðum. Þannig að það er okkar helsta markmið - að láta reyna á okkur.“