Sjöfalda spennuna og þrefalda aflið

Í dag afhjúpuðu verkfræðinemar við Háskóla Íslands TS15, nýjan kappakstursbíl. Team Spark liðið, eins og það kallast, fer með bílinn nýja í alþjóðlegu kappaksturs- og hönnunarkeppnina Formula Student sem haldin verður á Silverstone-kappakstursbrautinni í Englandi í júlí.  Lið Háskóla Íslands vann einmitt til verðlauna á brautinni í fyrra.

Samkvæmt tilkynningu frá Háskóla Íslands hafa lið frá skólanum tekið þátt í keppninni undanfarin fjögur ár en þetta verður í annað sinn sem þau mæta með fullbúinn bíl. Rúmlega hundrað lið frá háskólum víða um heim hafa tekið þátt í keppninni á Silverstone undanfarin ár en keppt er í tveimur flokkum. Í flokki 1 eru lið dæmd út frá bæði hönnun einstakra hluta bílsins og akstri hans á kappakstursbraut en í flokki 2 eru aðeins hönnun og áætlanir kynntar en ekki keppt í kappakstri. Team Spark keppir í flokki 1 í ár líkt og í fyrra en þá hlaut liðið flest stig allra liða fyrir endurnýjanleika bíls og sérstök verðlaun sem bestu nýliðar í sínum flokki.

Þriðjungi léttari en í fyrra

„Helsti munurinn  á þessum bíl og bílnum í fyrra er að þá bjuggum við til bíl sem myndi keyra. Núna erum við að gera bíl sem keyrir og er samkeppnishæfur bestu tækniháskólum í heimi. Þrjú helstu markmið okkar var að létta bílinn um þriðjung, sjöfalda spennuna og þrefalda aflið,“ segir Aðalheiður Guðjónsdóttir, liðstjóri Team Spark í samtali við mbl.is.

„Þetta eru þessar þrjár stóru tölur sem við erum að reyna að breyta síðan í fyrra. Þetta er geigvænleg breyting ef við berum  saman bílana tvo,“ segir Aðalheiður. Kappakstursbíll Team Spark var rúm þrjúhundruð kíló í fyrra. Markmiðið í ár er að bíllinn sé þriðjungi léttari, eða um 200 kíló.

„Við höfum líka algerlega skipt út rafhlöðunni og fórum úr tveimur frekar klossuðum mótórum í einn nettan. Þetta eru stórar breytingar sem valda breytingunni í afli og spennu bílsins,“ segir Aðalheiður.

Til þess að létta bílinn um hundrað kíló þarf að létta hvern einasta íhlut bílsins eins mikið og hægt er. „Við losuðum þrjátíu rör í grindinni en þau voru áður rúmlega 100,“ segir Aðalheiður. „Hver einasti íhlutur er léttari og efnisminni en í fyrra. Til dæmis er skelin helmingi léttari, hún var 9 kíló en er nú 4,5 kíló.“

Bæta 100% vinnu ofan á 100% nám

Tæplega 40 nemendur í verkfræðideildum Háskóla Íslands hafa unnið að þróun og smíði kappakstursbílsins síðan í haust. Var það m.a. gert í samstarfi við nemendur úr Listaháskóla Íslands. Að baki bílnum liggja mörg þúsund vinnustundir og er liðið staðráðið í að fylgja eftir góðum árangri í kappaksturs- og hönnunarkeppninni á síðasta ári, en þá hlaut Team Spark sérstaka viðurkenningu sem bestu nýliðarnir.

Aðalheiður segir mikla vinnu að baki gerðar kappakstursbílsins. „Við erum flest að taka þetta með 100% námi og því mikið að gera hjá öllum. Þetta er metið í rauninni sem hálft valfag þannig við fáum nokkrar einingar fyrir þetta. En flestir eru þá að bæta 100% vinnu ofan á 100% nám.“

Af 39 sem standa að gerð bílsins fara 33 út til þess að vera við Formula Student. Aðalheiður segir að það sé góður andi í hópnum. „Í  fyrra var okkur hrósað fyrir liðsheildina. Bæði dómarar og aðstandendur annarra liða hrósuðu íslenska liðinu í fyrra fyrir samheldni og liðsheild og sú liðsheild sést vel á því hversu margir fara út í ár.“

• Blogga um frétt