Tækni & vísindi | mbl | 22.4.2015 | 16:03

Póstkort frá jörðinni okkar

Mynd 1 af 4 Samsett mynd sem Suomi National Polar-orbiting Partnership-geimfarið tók af sunnanverðri Afríku og höfunum í kring 9. apríl 2015. Efst til hægri má sjá hitabeltisstorminn Joalane. Ocean Biology Processing Group við Goddard Space Flight Center NASA

Mynd 2 af 4 Ein frægasta myndin í sögu geimkönnunar var tekin í Apollo 8-leiðangrinum, fyrsta mannaða leiðangrinum sem fór í kringum tunglið. Á henni tókst geimförunum að fanga jarðarupprás frá tunglinu á aðfangadag árið 1968. NASA

Mynd 3 af 4 Voyager 1 náði fyrstu myndinni sem sýndi jörðina og tunglið saman í sama rammanum 18. september árið 1977. Hún var tekin úr rúmlega 11 milljón kílómetra fjarlægð frá jörðinni. NASA/Voyager 1

Mynd 4 af 4 Þessa mynd af jörðinni tóku síðustu tunglfararnir í Apollo 17-leiðangrinum 17. desember árið 1972 á leið sinni til tunglsins. Hún hefur verið nefnd bláa glerkúlan. NASA

Dagur jarðarinnar er haldinn hátíðlegur í 45. skipti í dag og í tilefni af því hefur bandaríska geimvísindastofnunin NASA birt röð sögulegra mynda sem teknar hafa verið af heimkynnum okkar úr geimnum í gegnum tíðina.

Fyrsti jarðardagurinn var haldinn 22. apríl árið 1970. Hann er helgaður fræðslu um umhverfismál og er honum fagnað árlega með ýmsum hætti um allan heim.

Myndir NASA af jörðinni sýna bæði stóran hnött sem er heimkynni milljarða manna en er á sama tíma aðeins sem sandkorn í víðáttum alheimsins.