„Jörðin okkar er með krabbamein, ég er líka með krabbamein“

Skjáskot af YouTube

Stundum þarf að horfa á hluti úr fjarlægð til að átta sig á þeim og það má með sanni segja að geimfararnir um borð í Alþjóðlegu geimstöðinni hafi slíkt sjónarhorn á málefni jarðarinnar.

Í meðfylgjandi myndbandi, sem birtist síðasta laugardag, kalla þeir ásamt öðrum geimförum og vísindamönnum frá öllum heimshornum eftir raunverulegum aðgerðum gegn loftslagsbreytingum og hvetja fundarmenn á loftslagsfundi Sameinuðu þjóðanna í París til dáða.

550 mannverur hafa farið út í geim og geimfarinn Michael Lopez-Alegria segir í myndbandinu hafa sumar þeirra gert svo oftar en einu sinni og þannig séð áhrif loftslagsbreytinga með eigin augum. Geimfararnir lýsa því hvernig regnskógarnir, vötn, og jöklar hafa minnkað á milli ferða þeirra og hvernig andrúmsloftið tengi allt mannkyn, óháð staðsetningu á jörðinni.

„Ímyndið ykkur að ég gæti flutt þær upplifanir sem ég hef átt til ykkar. Þá mynduð þið fara út og sjá jörðina innan úr og með viðhorfi geimfara. Maður byrjar að elska jörðina, og ef maður elskar eitthvað í alvöru vill maður ekki missa það. Jörðin okkar er með krabbamein, ég er líka með krabbamein,“ segir geimfarinn Wubbo Ockels í myndbandinu.

Ockels var fyrsti Hollendingurinn til að fara út í geim. Hann lést daginn eftir að myndbandið var tekið upp.


 

mbl.is
Fleira áhugavert
Fleira áhugavert