Hópur stjörnufræðinga fékk því framgengt að flugfélagið Alaska Airlines seinkaði flugferð sinni frá Alaska til Havaí til að farþegunum um borð gæfist kostur á því að berja sólmyrkvann í vikunni augum. Flaug vélin því í gegnum skugga tunglsins og áttu sumir farþegarnir erfitt með að hemja sig á meðan.
Fyrir um ári uppgötvaði stjörnufræðingurinn Joe Rao að flugleið Alaska Airlines á milli Anchorage í Alaska og Honolulu á Havaí lægi í gegnum skuggann sem tunglið varpar á jörðina þegar það skyggir á sólina. Hefðbundinn brottfarartími flugvélarinnar var hins vegar of snemma á ferðinni og því setti Rao sig í samband við flugfélagið. Það féllst á að seinka brottförinni til að ná sólmyrkvanum, að því er kemur fram í frétt á vef Alaska Airlines.
Um borð í vélinni á miðvikudag var fjöldi stjörnufræðinga sem fögnuðu ákaft þegar skuggi tunglsins náði flugvélinni í háloftunum og sólin myrkvaðist. Einn þeirra, Mike Kentrianakis frá Bandaríska stjörnufræðifélaginu, festi atburðinn á filmu en átti erfitt með að hemja tilfinningar sínar eins og heyra má á myndbandinu hér fyrir neðan.