ExoMars-leiðangur evrópsku og rússnesku geimstofnananna hófst í morgun þegar fyrsta könnunarfari hans var skotið á loft frá Kasakstan. Geimskotið virðist hafa gengið að óskum. Það tekur hins vegar um tíu klukkustundir að að koma geimfarinu á rétta braut til nágrannareikistjörnunnar.
Rússneska Proton-eldflaugin hóf sig á loft kl. 9:31 að íslenskum tíma í morgun með könnunarfarið á trjónunni. Það er í raun tvö geimför, annað þeirra brautarfar sem mun meðal annars leita að metani í lofthjúpi Mars en hitt er lendingarfar sem undirbýr jarðveginn fyrir síðari áfanga ExoMars-leiðangursins. Það er könnunarjeppi sem verður skotið á loft árið 2018 þó mögulegt sé að það dragist til 2020.
Þó að geimskotið hafi gengið að óskum þá verður ekki ljóst fyrr en um kl. 21:30 í kvöld hvort að eldflaugin hafi komið geimfarinu á rétta braut til Mars. Þá mun það hafa náð 33.000 km/klst hraða. Biðin verður eflaust óbærileg fyrir marga starfsmenn rússnesku geimferðastofnunarinnar ROSCOSMOS enda hafa leiðangrar hennar til Mars gengið vægast sagt brösulega í gegnum tíðina.
Fram að þessu hafa Rússar skotið 19 leiðöngrum á loft til Mars en flestir þeirra hafa misheppnast algerlega. Sumir komust ekki af skotpallinum, aðrir komust ekki lengra en á braut um jörðu og enn aðrir brotlentu annað hvort á Mars eða sigldu beinustu leið fram hjá áfangastað sínum.
Ferðalagið til Mars tekur um sjö mánuði en Schiaparelli-lendingarfarið á að lenda á yfirborði reikistjörnunnar 19. október. Brautarfarið TGO verður á braut um Mars við rannsóknir á lofthjúpnum en það mun einnig styðja síðari áfanga ExoMars þegar könnunarjeppa verður lent á plánetunni.