Microsoft hefur samþykkt að greiða konu einni 10.000 dollara í skaðabætur en hún fullyrðir að tölvan hennar hafi orðið ónothæf eftir að hún uppfærði sjálfkrafa í stýrikerfið Windows 10. Fyrirtækið segist hafa hætt við áfrýjun til að forðast frekari lögfræðikostnað.
Konan segir að hún hafi verið með Windows 7 á tölvunni sem hún notar til að reka fyrirtækið sitt í Kaliforníu. Tölvan hafi hins vegar uppfært sjálfkrafa í Windows 10 án samþykkis hennar og í kjölfarið orðið óstöðug.
Windows 10 er ókeypis uppfærsla fyrir þá sem eru með eldri stýrikerfin Windows 7 og 8 en Microsoft hefur lagt mikla áherslu á að fá notendur til að skipta yfir í nýja kerfið. Margir hafa hins vegar valið að uppfæra ekki af ýmsum ástæðum.
Í febrúar kom tæknirisinn því þannig fyrir að tölvur náðu sjálfkrafa í uppfærsluna nema notendur þeirra lokuðu sérstaklega fyrir það.
„Ég hafði aldrei heyrt um Windows 10. Enginn spurði mig hvort ég vildi uppfæra,“ segir konan.