Ekki hlýrra frá því mælingar hófust
Setja bókamerki
Síðasti mánuður var sá hlýjasti á jörðinni frá því að mælingar hófust samkvæmt gögnum bandarísku geimvísindastofnunarinnar NASA. Júlímánuður var jafnframt tíundi mánuðurinn í röð sem slær hitamet fyrir þann tiltekna mánuð. Vísindamenn segja að 99% líkur séu á því að árið í ár verði það hlýjasta frá því að mælingar hófust.
„Júlí 2016 var algerlega hlýjasti mánuður frá því að mælingar hófust,“ segir Gavin Schmidt, forstöðumaður Goddard-geimrannsóknarstofnunar NASA (GISS) sem heldur utan um hitastigsmælingarnar.
Meðalhitinn í júlí var 0,1°C meiri en í næstheitasta júlímánuðinum árið 2011. Júlí var ennfremur 0,84°C hlýrri en meðaltal áranna 1951-1980. Meiri hlýindi voru á flestum land- og hafsvæðum jarðarinnar en í venjulegum júlímánuði. Á sumum svæðum á Norðurheimsskautinu var hins vegar allt að fjórum gráðum hlýrra en vanalega.
July data are out, and what do you know, still 99% chance of a new annual record in 2016. pic.twitter.com/ndSsbYuedA
— Gavin Schmidt (@ClimateOfGavin) August 15, 2016
David Karoly, loftslagsvísindamaður við Háskólann í Melbourne, segir við The Guardian að mælingarnar þýði að júlímánuður hafi verið um 1,3°C hlýrri en meðaltal tímabilsins fyrir iðnbyltingu.
Mælingar japönsku veðurstofunnar benda einnig til þess að júlímánuður hafi slegið hitamet á jörðinni. Bandaríska haf- og loftslagsstofnunin NOAA birtir greiningu sína fyrir júlí í þessari viku.
„Mér finnst það svolítið áhyggjuefni að við skulum fara í gegnum þessi met eins og ekkert sé í ár,“ segir Jason Furtado, prófessor í veðurfræði við Oklahoma-háskóla við Washington Post.
Óvenjusterkur el niño-viðburður hefur sett mark sitt á loftslag jarðarinnar frá því í fyrra en hann fjaraði út í vor. Frávikið frá meðalhita er því ekki eins mikið nú og þegar veðurfyrirbrigðisins naut við.
Simon Donner, prófessor í loftslagsfræði við Háskólann í Bresku Kólumbíu í Kanada, segir að ekki sé hægt að rekja alla hlýnunina í ár til el niño.
„Metin sem hafa verið sett árið 2016 hafa malað þau sem voru sett í fyrri el niño-viðburðum,“ segir hann.
Átta morðmál á aðeins tólf mánuðum
Mest spennandi kosningar í áratugi
Fiskikóngurinn: „Mér fannst sárt að heyra það“
Myndskeið: „Fólk var komið ískyggilega nálægt“
„Mér finnst Halla Hrund svona Vigdísarleg“
Áköf mótmæli í bandarískum háskólum