Tækni & vísindi | mbl | 1.5.2017 | 12:57

Eldflaugaskotið gekk eins og í sögu

Frá eldflaugaskotinu í morgun. SpaceX skaut á loft Falcon 9 eldflaug sem lenti síðan upprétt á lendingarpalli. AFP

„Og það er lending. Skotbúnaður eldflaugarinnar er lentur á Lendingarsvæði 1,“ sagði yfirvélarverkfræðingur SpaceX, John Federspiel, þegar hann lýsti eldflaugarskoti SpaceX í morgun. Falcon-eldflaug sem bar njósnabúnað bandaríska hersins var skotið á loft í morgun.

Eldflaugaskotið markar mikil kaflaskil þar sem um er að ræða fyrsta eldflaugaskot SpaceX fyrir varnamálaráðuneyti Bandaríkjanna, sem stofnandinn Elon Musk hefur lengi gengið á eftir. SpaceX kærði t.a.m. flugherinn vegna einokunarstöðu Boeing og Lockheed-Martin á eldflaugaskotum fyrir varnarmálaráðuneytið.

Þegar fyrsta lag flaugarinnar, skotbúnaðurinn, skildi sig frá flauginni tók hann stefnuna að lendingarpallinum og lenti þar uppréttur. Er það í tíunda skipti sem það tekst en SpaceX tókst það fyrst í desember 2015. Er tæknin talin verða til þess að draga verulega úr kostnaði sem fylgir eldflaugaskotum.

Elon Musk, stofnandi og eigandi SpaceX. AFP

Flauginni var skotið á loft frá Kennedy Space Center í Flórída og eins og segir að ofan var markmiðið að skjóta njósnabúnaði á sporbaug. Varnarmálaráðuneyti Bandaríkjanna hefur þó ekki viljað tjá sig frekar um hvers eðlis búnaðurinn er að því er kemur fram í frétt á vef Space.com. Þar segir enn fremur að þetta hafi verið 34. eldflaugaskot SpaceX.