Leturgerðin kom upp um svikin

Nawaz Sharif forsætisráðherra og dóttir hans Maryam eru í miðju ...
Nawaz Sharif forsætisráðherra og dóttir hans Maryam eru í miðju mikils hneykslismáls sem skekur nú Pakistan. Margir netverjar hafa tjáð sig með húmorinn að vopni og kalla málið Fontgate.

Forsætisráðherra Pakistans er í vondum málum eftir að upp komst að fjölskylda hans falsaði líklega skjöl sem áttu að sýn fram á lögmæti viðskipta fjölskyldunnar í gegnum skattaskjól en nöfn barna ráðherrans var að finna í Panamaskjölunum. Að lokum var það leturgerð sem kom upp um svikin.

Vandræði Nawaz Sharif forsætisráðherra hófust í fyrra er upplýsingum úr milljónum skjala, hinum svokölluðu Panamaskjölum, var lekið á netið. Samkvæmt þessum gögnum höfðu nokkur af börnum Sharifs notað skúffufyrirtæki til að kaupa fasteignir og ekki talið það fram.

Nafn forsætisráðherrans kom ekki fram í skjölunum en engu að síður upphófst rannsókn í Pakistan á fjármálum hans. Hæstiréttur komst svo að þeirri niðurstöðu að Sharif gæti haldið áfram sem forsætisráðherra þar sem ekki hafði tekist að sanna spillingu.

En það gæti breyst í kjölfar nýrra upplýsinga. Það sem fellt gæti ráðherrann er leturgerðin Calibri.

Rannsóknarnefnd lauk störfum á mánudag og telur hún grun leika á að dóttir Sharifs, Maryam, hafi falsað skjöl sem hún lagði fram til að sýna fram á sakleysi sitt. Eitt skjalanna sem um ræðir er afsal fasteignar sem er dagsett er árið 2006. Það er skrifað með leturgerðinni Calibri sem var þó ekki til á þessum tíma. Það var ekki fyrr en árið 2007 sem hún var kynnt til sögunnar og fékk hraða útbreiðslu.

Í fréttaskýringu BBC um málið er rætt við fjölda sérfræðinga. Þeir segja að tilraunaútgáfa af Windows 2007 hafi verið í notkun allt frá árinu 2004 og í henni hafi leturgerðin Calibri verið í boði. Skapari leturgerðarinnar segir að þessi tilraunaútgáfa hafi þó aðeins verið notuð af fáum og fyrst og fremst tæknifólki. 

Forsætisráðherrann og fjölskylda hans hafna þessum ásökunum alfarið og segja þær runnar undan rifjum pólitískra andstæðinga Sharifs. 

Stjórnendur vefalfræðiritsins Wikipedia hafa nú lokað fyrir breytingar á grein sem fjallar um leturgerðina Calibri. Andstæðingar forsætisráðherrans sem og hans stuðningsmenn hófu eftir að málið kom upp að senda fjölda breytingatillagna um greinina á Wikipedia. Stjórnendur gripu því til þess ráðs, sem þeir gera stundum þegar heit umræða skapast um ákveðna sagnfræði, að loka fyrir allar breytingar á greininni þar til í næstu viku en þá tekur Hæstiréttur málið fyrir.

Málið hefur vakið mikla athygli síðustu daga og hafa margir netverjar tjáð sig um það undir myllumerkinu #Fontgate.



mbl.is
Sumarhús – Gestahús – Breytingar O?Fram
Sumarhús - Gestahús - Breytingar ? Framleiðum stórglæsileg sumarhús í ýmsum stær...
HÚSAVIÐGERÐIR
Viðgerðir og viðhald fasteigna er okkar fag. Húsaklæðning ehf. hefur í áratugi ...
 
Samþykkt breyting á deiliskipulagi
Tilkynningar
Samþykkt breyting á deiliskipulagi Da...
Framhald
Nauðungarsala
Uppboð Einnig birt á www.naudungarsolu...
L edda 6017112119 i h&v
Félagsstarf
? EDDA 6017112119 I H&V; Mynd af augl...
Eldri borgarar
Staður og stund
Aflagrandi 40 Opin vinnustofa kl. 9 og g...