Kynnti sviðsmynd um minnkandi losun

Sigurður Ingi Friðleifsson á umhverfisþingi í dag.
Sigurður Ingi Friðleifsson á umhverfisþingi í dag. Ljósmynd/Umhverfisráðuneytið

Áætla má að Ísland þurfi að minnka árlegan útblástur gróðurhúsalofttegunda um allt að milljón tonn koldíoxíðs fyrir 2030. Hægt væri að ná um helmingi þessa samdráttar með aðgerðum í samgöngum. Þetta kemur fram í nýrri samantekt Sigurðar Inga Friðleifssonar, sem hann kynnti á Umhverfisþingi í dag.

Um er að ræða eina sviðsmynd af mörgum sem gætu náð markmiðum um 35-40% minni losun 2030 en var árið 1990.

Sigurður Ingi starfaði sem sérfræðingur með verkefnisstjórn um aðgerðaáætlun í loftslagsmálum, sem ríkisstjórnin skipaði fyrr á árinu. Hlé varð á starfi verkefnisstjórnar við ríkisstjórnarslitin í síðasta mánuði, en samantektina byggir Sigurður á megináherslum aðgerðaáætlunarinnar og vinnu faghópa.

Auk aðgerða á sviði samgangna benti Sigurður á aðgerðir til að draga úr notkun jarðefnaeldsneytis, sér í lagi í sjávarútvegi, sem skilað gætu samdrætti í losun gróðurhúsalofttegunda um allt að 175 þúsund tonn.

Þá er benti hann á aðgerðir í landbúnaði, vegna rafmagns og húshitunar sem og á sviði úrgangsmála sem samtals gætu skilað samdrætti upp á 325 þúsund tonn. Þannig er brugðið upp sviðsmynd með aðgerðum til að mæta þeim 1000 tonna árlega samdrætti í losun gróðurhúsalofttegunda, sem skuldbindingar Íslands kveða á um.

mbl.is
Fleira áhugavert
Fleira áhugavert