„Þú selur ekki mikið á meðan vefverslunin er niðri“

Svona lítur síða Samfylkingarinnar út í dag, en hún liggur …
Svona lítur síða Samfylkingarinnar út í dag, en hún liggur niðri vegna kerfishruns hjá fyrirtækinu 1984 ehf. Skjáskot

Mörg íslensk fyrirtæki og félög hafa misst niður heimasíður sínar og tölvupóstþjóna vegna algjörs kerfishruns hjá hýsingarfyrirtækinu 1984. Reynir Stefánsson, sérfræðingur í upplýsingatækni hjá Opnum kerfum, segir íslensk fyrirtæki aftarlega á merinni þegar komi að því að gera áhættumat fyrir rekstur þeirra.

„Það er flókið að reka gott hýsingarumhverfi og það er náttúrlega dýrt og þess vegna eru fyrirtæki almennt séð að úthýsa tölvuumhverfi sínu, hvort sem um er að ræða heimasíðu, tölvupóst eða hreinlega fjárhagsbókhaldið,“ segir Reynir í samtali við mbl.is.

„Fyrirtækin þurfa að gera áhættumat fyrir reksturinn hjá sér, þannig að tölvukerfið og það hvernig það er byggt upp sé með áhættumat sem endurspeglar reksturinn. Ef þú ert að reka vefverslun þarftu að spyrja þig, hversu lengi má vefverslunin vera úti? Þú selur ekki mikið á meðan vefverslunin er niðri. Má hún vera niðri í klukkutíma eða má hún vera úti í viku?“

Mögulegt að hafa kerfin tvöföld

Reynir segir mjög mikilvægt að tíðni afrita sé stillt með tilliti til þess hversu mikilvæg gögnin eru og að vefsíður eða tölvukerfi sem megi alls ekki liggja niðri þurfi að tryggja sig sérstaklega. Það sé til dæmis hægt að gera með því að hafa kerfin tvöföld.

„Þú getur verið með keyrandi heimasíðu á sitt hvorum staðnum á hnettinum eða sitt hvorum staðnum á landinu, þannig að ef hún bilar eða „feilar“ á öðrum staðnum þá hangir hún uppi hinumegin,“ segir Reynir, sem telur fyrirtæki þurfa að horfa inn á við, leita ráðgjafar hjá sérfræðingum og fá hjá þeim ábendingar og tillögur að lausnum og úrbótum.

„En númer eitt, tvö og þrjú þá eiga þeir [innskot blm.: hjá 1984] alla mína samúð með þetta og ég hrósa þeim fyrir að koma hreint fram og segja hvað er í gangi, því þetta getur haft verulegt fjárhagslegt tjón fyrir þá og þeirra viðskiptavini.“

mbl.is
Fleira áhugavert
Fleira áhugavert