Meirihluti notar deilisíður

Þeim Íslendingum fækkar sem aldrei hafa notað tónlist, sjónvarpsefni eða kvikmyndir sem hefur verið hlaðið niður af deilisíðum. Þannig voru 44% Íslendinga sem aldrei hafa notað efni sem hefur verið hlaðið niður með slíkum hætti, samanborið við 50% árið 2015 í könnun MMR. Auk þess kom í ljós að fólk á aldrinum 18 - 29 ára reyndist líklegasti aldurshópurinn til að nota efni sem hlaðið hefur verið niður af deilisíðum, samkvæmt fréttatilkynningu MMR.

MMR gerði könnun á notkun íslendinga á deilisíðum dagana 6. til 11. október.

Fólk á aldrinum 18 - 29 ára var töluvert líklegra en fólk í öðrum aldurshópum til að nota tónlist, sjónvarpsefni eða kvikmyndir sem hlaðið hafði verið niður af erlendum eða innlendum deilisíðum.

Sá hópur var jafnframt líklegri en aðrir aldurshópar til að gera slíkt 3 sinnum í viku eða oftar. Auk þess mátti sjá að því yngri sem svarendur voru, því líklegri voru þeir til að segjast hafa notað efni sem hlaðið var niður af erlendum eða innlendum deilisíðum. Þannig voru 84% svarenda á aldrinum 18 - 29 ára sem höfðu notað efni sem hlaðið var niður af deilisíðum, samanborið við 18% svarenda á aldrinum 68 ára og eldri. 

„Aukning á notkun efnis sem hlaðið var niður af deilisíðum hefur helst orðið í aldurshópnum 50 - 67 ára en 41% svarenda í þeim aldurshóp sögðust hafa notað efni sem hlaðið hafði verið niður með slíkum hætti, borið saman við 27% svarenda árið 2015. Þetta gefur til kynna breytingu á neysluvenjum fólks á notkun efnis af deilisíðum. Sú breyting er í takt við þá þróun sem á sér stað á markaðinum en neytendur eru í auknum mæli farnir að nýta sér einfaldar og hraðvirkar streymisveitur, á borð við Netflix og Hulu.

Auk þess var áhugavert að sjá að fólk með hærri menntun var líklegra til að segjast hafa notað efni sem hlaðið var niður af deilisíðum, borið saman við fólk með lægri menntun. Sem dæmi var 47% fólks með grunnskólamenntun sem höfðu notað efni sem hlaðið var niður af deilisíðum, á meðan 62% fólks með háskólamenntun höfðu gert slíkt hið sama. Hins vegar var fólk með grunnskólamenntun líklegra en fólk með hærri menntun til að nota efni 3 sinnum í viku eða oftar sem hlaðið hafði verið af deilisíðum, eða 24%.

Ef munur var skoðaður eftir stuðning við stjórnmálaflokka kom í ljós að flest stuðningsfólk Pírata hafði notað efni sem hlaðið hafði verið niður af deilisíðum, eða 79%, og var auk þess líklegra en stuðningsfólk annarra stjórnmálaflokka til að gera slíkt. Aftur á móti var stuðningsfólk Sjálfstæðisflokksins og Samfylkingarinnar líklegra en stuðningsfólk annarra stjórnmálaflokka til að hafa aldrei notað efni sem hlaðið var niður af deilisíðum, eða 57% hvor, [sic]“ segir á vef MMR.

• Blogga um frétt