Bæklingi um þjóðaratkvæðagreiðslu dreift
Verið er að dreifa upplýsingabæklingi um þjóðaratkvæðagreiðsluna, sem á að fara fram um Icesave-lögin á laugardag. Dóms- og mannréttindaráðuneytið gefur bæklinginn út en Lagastofnun Háskóla Íslands gerði textann.
Í bæklingnum kemur m.a. fram, að samningarnir um Icesave-reikningana séu lánasamningar frá 5. júní 2009 með viðaukum frá 19. október 2009. Saman myndi þeir eina heild.
Skuldari er Tryggingarsjóður innstæðueigenda og fjárfesta, ábyrgðaraðili er íslenska ríkið og lánveitendur eru annars vegar breska ríkið og hins vegar hollenska ríkið.
Þá segir, að þar sem íslenska ríkið sé ábyrgðaraðili samkvæmt samningunum þurfi Alþingi að setja lög sem heimila ríkisábyrgð, fyrr geti þeir ekki tekið gildi. Eftir að lánasamningarnir frá 5. júní höfðu verið gerðir samþykkti Alþingi lög nr. 96/2009 um heimild til að veita ríkisábyrgð en að auki skilyrði og fyrirvara sem ekki komu fram í samningunum. Þeir gátu því ekki tekið gildi og samningaviðræður hófust að nýju. Niðurstaðan af þeim viðræðum er í viðaukum sem gerðir voru við lánasamningana 19. október 2009.Í kjölfar viðaukanna setti Alþingi lög nr. 1/2010 sem nú verða greidd atkvæði um. Lögin breyta tilteknum ákvæðum í lögum nr. 96/2009 og heimila íslenskum stjórnvöldum að veita ríkisábyrgð á þann hátt sem gert er ráð fyrir í Icesave-samningunum eins og þeim var breytt í október. Verði lög nr. 1/2010 samþykkt geta Icesave-samningarnir tekið gildi.
Verði lögum nr. 1/2010 hafnað í þjóðaratkvæðagreiðslu gilda eldri lögin óbreytt. Icesave-samningarnir, hvort heldur er frá júní eða október 2009, taka að öllu óbreyttu ekki gildi á grundvelli þeirra. Ástæðan er sú að ríkisábyrgðin samkvæmt lögum nr. 96/2009 er ekki í fullu samræmi við ákvæði samninganna, að því er segir í bæklingnum.
Nánar er fjallað um atkvæðagreiðsluna á vefnum Þjóðaratkvæði.is.
