Kosningarnar ljúka ekki málinu

„Þjóðaratkvæðagreiðslan markaði tímamót af því hún markaði brautina að beinu lýðræði og það er jákvætt,“ sagði Jóhanna Sigurðardóttir, forsætisráðherra, en hún fór yfir stöðuna að lokinni þjóðaratkvæðagreiðslu í upphafi þingfundar í dag. Þakkaði hún tækifærið til ræða málið á þinginu í dag.

„Úrslitin voru skýr um kosningaefnið sjálft, en þau ljúka hvorki málinu né leysa vandann. Þrátt fyrir skýr úrslit er enn ósamið í Icesave-deilunni,“ sagði Jóhanna og minnti á að strax í kjölfar synjunar forsetans hafi verið skipuð nýja samninganefnd í góðri sátt allra flokka. Sagði hún áherslu hafa verið lögð á að sá þráður sem náðst hafi í nýjum samningaviðræðum slitnaði ekki þó til þjóðaratkvæðagreiðslu kæmi.

Íslensk stjórnvöld munu áfram vinna að lausn málsins. Sagði hún mikilvægt að halda áfram samningaviðræður í þverpólitískri sátt. Upplýsti hún að ríkisstjórnin hygðist sem fyrst funda með fulltrúum stjórnarandstöðunnar til þess að ræða næstu skref. Sagðist hún vænta þess að góð sátt myndi áfram ríkja manna á meðal í málinu.

Jóhanna minnti á hvað töf á sátt um málið hefði kostað íslenskt samfélag mikið, þannig hefði efnahagsleg endurreisn ríkisins tafist um a.m.k. hálft ár. Sagði hún vandasamt að reikna út í krónum og aurum hvað töfin hefði kostað, en kostnaðurinn væri samt áþreifanlegur.

Jóhanna minnti á orð Diminique Strass-Kahn, framkvæmdastjóra Alþjóðagjaldeyrissjóðsins (AGS) um helgina þess efnis að Icesave-deilan væri einkamál landanna þriggja sem að deilunni komi.

Gagnrýndi hún stjórnarandstöðuna fyrir að vilja stjórna úr aftursætinu án þess að taka ábyrgð á málum. Sagði hún út í hött að túlka þjóðaratkvæðagreiðslunnar um helgina sem vantraust á ríkisstjórnina, enda málið allt afmarkaður fortíðarvandi.

Minnti hún á að ríkisstjórnin hefði þingstyrk til þess að koma mikilvægum málum í gegnum þingið. Hún ítrekaði að hún væri ávallt reiðubúin til þess að leita sátta, en hins vegar væri ekki hægt að taka tillit til ítrustu óska.