Fréttaskýring: Með heimspressuna í túnfætinum

Þó deila megi um hversu gott eða jákvætt tilefnið er þá er ljóst að skilningur erlendra fjölmiðla á þessari flóknu deilu um Icesave hefur aukist þessa síðustu daga. Þegar skoðuð er umfjöllun erlendra fjölmiðla er ljóst að sá skilningur að Íslendingar hafi kosið um að neita alfarið að borga er víkjandi. Þó vissulega sé gests augað oft glöggt þá má það ljóst vera að ekki er auðvelt fyrir utanaðkomandi að skilja þetta erfiða mál sem þjakað hefur þjóðina í eitt og hálft ár og hún sjálf skilur ekki á einn veg! Hvað svo sem fólki finnst um málið og þjóðaratkvæðagreiðsluna þá er það ekki á hverjum degi sem heimspressan mætir í túnfótinn. Sjaldan hefur gefist jafn gott tækifæri til að koma sjónarmiðum okkar í þessu máli á framfæri.

Íslensk stjórnvöld komu upp miðstöð fyrir erlenda frétta- og blaðamenn á efri hæð Iðnó. Urður Gunnarsdóttir fjölmiðlafulltrúi utanríkisráðuneytis segir fulltrúa frá yfir fimmtíu miðlum hafa sett sig í samband og nýtt sér miðstöðina. Flestir blaða- og fréttamannanna hafi verið frá Evrópu, en einnig frá Bandaríkjunum, Kanada, Kína og Japan. Hún segir stjórnvöld hafa skipulagt blaðamannafundi með ráðherrum sem og viðtöl. Urður sagðist skynja að skilningur á málinu hefði aukist mikið undanfarna daga. Þá væri það jákvætt að núna væri búið að koma á beinum tengslum við stóran hóp blaða- og fréttamanna og því yrði fylgt eftir.

En fleiri hafa sinnt hinum erlendu blaða- og fréttamönnum. Forseti Íslands hefur ekki legið á liði sínu og má sjá viðtöl við hann víða í erlendum fjölmiðlum. Indefence-hópurinn var duglegur við að veita viðtöl og aðspurður segist hann fastlega búast við að umfjöllun um Icesave haldi áfram í erlendum fjölmiðlum næstu daga. Núna væri þessi léttari sjónvarpsumræða að klárast og við tækju dýpri fréttaskýringar. Hingað hefðu komið þrautþjálfaðir, þekktir fréttaskýrendur frá dagblöðum og tímaritum sem myndu færa umræðuna á dýpra stig næstu daga.

Vantar jákvæðar sögur

Stjórnvöld hafa verið gagnrýnd fyrir að slælega framgöngu við að koma sjónarmiðum Íslendinga á framfæri í erlendum fjölmiðlum. Fólk sem starfar á sviði almannatengsla er sammála um að nokkuð vel hafi tekist til og að umræðan í erlendum fjölmiðlum sé nær sannleikanum og jákvæðari en áður. Það hefði kannski mátt nýta tækifærið betur til að koma á framfæri því sem gert hafi verið til að reisa landið við og bæta ímyndina. Þannig hefði verið tilvalið að segja frá nýju frumvarpi um hertar reglur með fjármálstofnunum. Þá væri alltaf eftirspurn eftir persónulegum sögum. Skemmtilegar sögur um fólk sem hefur fundið upp á ýmsu nýstárlegu í kreppunni. Sögur um fólk sem hefði misst vinnuna í bankanum en komið upp prjónastofu og fleira í þeim dúr. En blaðamennirnir hafa farið víða og hver veit nema jákvæðar sögur um frumlega og umfram allt siðlega nýsköpun á Íslandi fari víða.