Hyggjast beita sér gegn samvinnunni við AGS

„Ef Ísland fer ekki eftir alþjóðlegum skuldbindingum sínum vitum við ekki hvers vegna við ættum að horfa á jákvæðan hátt til Íslands ef landið sækir um aðild að Evrópusambandinu.

Það er fyrra atriðið. Hitt er að við vitum ekki hvers vegna við ættum að líta jákvæðum augum á umsókn Íslands um lán hjá Alþjóðagjaldeyrissjóðnum,“ segir Frans de Nerée tot Babberich, talsmaður þingflokks Kristilegra demókrata (CDA) í efnahagsmálum í Hollandi.

Vart er hægt að skilja orð hans öðruvísi en sem hótun, enda hafa Hollendingar áhrif innan sjóðsins.

Icesave-deilan var tekin til umræðu á hollenska þinginu í gær og gaf Jan Kees de Jager, fjármálaráðherra Hollands, til kynna að næstu skref væru í höndum Íslendinga.

Neðri deild þingsins samþykkti ályktun um stöðuna þar sem farið er fram á skjóta lausn málsins og að þrýstingurinn á Ísland verði aukinn.

Þá var meirihluti þingdeildarinnar sammála um að aðild Íslands að ESB kæmi að óbreyttu ekki til greina.

Sjá nánari umfjöllun um þetta mál í Morgunblaðinu í dag.