Fréttaskýring: Bretar og Hollendingar eru farnir að ókyrrast

Þótt formlegir fundir íslensku samninganefndarinnar um Icesave með fulltrúum Breta og Hollendinga hafi ekki verið haldnir um allnokkurt skeið, hafa óformlegar þreifingar og viðræður, bæði á milli embættismanna og fulltrúa í samninganefndum landanna þriggja átt sér stað.

Samkvæmt upplýsingum Morgunblaðsins liggur fyrir einskonar rammasamkomulag á milli landanna þriggja, óundirritað, en það mun fela í sér mun hagstæðari kjör fyrir Íslendinga, en hingað til hafa staðið til boða. Morgunblaðið hefur upplýsingar um að Bretar og Hollendingar og íslenski fjármálaráðherrann, Steingrímur J. Sigfússon, séu farnir að ókyrrast mjög, þar sem lokafrestur ESA, Eftirlitsstofnunar EFTA, til íslenskra stjórnvalda til þess að bregðast við áminningarbréfi stofnunarinnar, rennur út eftir réttar þrjár vikur, þann 7. desember.

Samkvæmt sömu heimildum vilja Bretar, Hollendingar og íslensk stjórnvöld ekki að áminningarbréfi ESA verði svarað og því stendur vilji til þess að samið verði um Icesave fyrir þann tíma.

Bjóða nú hagstæðari kjör

Morgunblaðið hefur upplýsingar um að Bretar og Hollendingar, einkum þó Bretar, vilji nú bjóða Íslendingum upp á mun hagstæðari kjör og skilmála, en þjóðirnar hafa hingað til verið reiðubúnar að gera. Samkvæmt upplýsingum Morgunblaðsins er komið nýtt hljóð í strokkinn hjá breskum og hollenskum stjórnvöldum, hvað varðar kröfur um kostnaðarhlutdeild Íslendinga í fjármagnskostnaði vegna Icesave.

Skýrum skilaboðum mun hafa verið komið á framfæri frá breskum og hollenskum stjórnvöldum, um að þau vildu fyrir alla muni ljúka samningum um Icesave hið fyrsta og bæði ríkin væru tilbúin til þess að falla frá upphaflegum kröfum sínum um stórfelldan vaxtakostnað Íslands og að hann yrði, samkvæmt heimildum Morgunblaðsins, aðeins brot af upphaflegum kröfum Breta og Hollendinga, eða um 3%.

Bjóða upp á vaxtahlé

Þannig mun í þeim rammadrögum, sem nú liggja fyrir hjá samninganefndum þjóðanna þriggja, vera gert ráð fyrir því að Icesave beri enga vexti fyrsta tímabilið, eða í níu mánuði. Þannig verði engir vextir greiddir, þegar upphæðin er hæst, en svo tæpu ári síðar, eða frá haustinu 2009, beri upphæðin ákveðna vexti. Ekki tókst að afla nákvæmra upplýsinga um hversu mikinn kostnað fyrir ríkissjóð drögin fela í sér, en hann mun vera einhvers staðar á bilinu 38 til 50 milljarðar króna, þannig að augljóslega er gífurlegur sparnaður í drögunum fólginn, miðað við þá samninga sem Svavar Gestsson, Indriði Þorláksson og þeirra nefnd gerði, og þjóðin hafnaði með afgerandi hætti í þjóðaratkvæðagreiðslu snemma á þessu ári.

Krefjast breiðrar samstöðu

Til þess að drögin verði að undirrituðum samningi þjóðanna þriggja, gera Bretar og Hollendingar kröfu um að skýrt liggi fyrir, að breið pólitísk samstaða sé um málið á Alþingi. Vilja Bretar og Hollendingar ekki láta sér nægja, að ríkisstjórn Samfylkingarinnar og VG hafi meirihluta á Alþingi; þeir vilja að fulltrúar stjórnarandstöðunnar, einkum Sjálfstæðisflokks, en einnig hinna flokkanna, lýsi því yfir, að Sjálfstæðisflokkurinn, eða a.m.k. stór hluti hans, muni samþykkja samninginn.

Fulltrúar stjórnarandstöðunnar hafa, samkvæmt upplýsingum Morgunblaðsins, talið að mörg brýnni mál brenni á þjóðfélaginu í heild í dag en að leiða samninga um Icesave til lykta í einhverju flaustri og því hafa þeir reynst ríkisstjórninni tregir í taumi.

Steingrímur J. Sigfússon, fjármálaráðherra, hefur því gripið til þess ráðs að reyna að virkja Viðskiptaráð, Samtök atvinnulífsins og einstaka forstjóra stórfyrirtækja til þess að þrýsta á um það við forystu Sjálfstæðisflokksins, að hún lýsi yfir stuðningi við samningsdrögin. Slíkar tilraunir hafa, samkvæmt upplýsingum Morgunblaðsins, borið takmarkaðan árangur hingað til og engin fyrirheit um slíkan stuðning hafa verið gefin, hvorki hvað varðar forystu Framsóknarflokksins né Sjálfstæðisflokksins.