20. september 2005 | Tónlist | 776 orð | 1 mynd

Hljómsveit Fólksins | Benny Crespo's Gang

Benny Crespo's Gang í æfingahúsnæði sveitarinnar.
Benny Crespo's Gang í æfingahúsnæði sveitarinnar. — Morgunblaðið/Golli
HLJÓMSVEIT Fólksins þessa vikuna er Benny Crespo's Gang en Morgunblaðið og mbl.is velja Hljómsveit Fólksins á tveggja vikna fresti.
HLJÓMSVEIT Fólksins þessa vikuna er Benny Crespo's Gang en Morgunblaðið og mbl.is velja Hljómsveit Fólksins á tveggja vikna fresti. Tilgangurinn er að kynna og styðja við grasrótina í íslenskri tónlist, beina athyglinni að nokkrum af þeim fjölmörgu íslensku hljómsveitum sem gera almenningi kleift að hlaða niður tónlist þeirra á netinu, án endurgjalds. Hljómsveit Fólksins er í samstarfi við Rás 2 og Rokk.is, en hægt er að lesa viðtalið á Fólkinu á mbl.is. Þar eru einnig tenglar á lög sveitarinnar sem geymd eru á Rokk.is. Lag með Benny Crespo's Gang verður spilað í dag í Popplandi á Rás 2, sem er á dagskrá kl. 12.45-16 virka daga.

Hverjir skipa sveitina?

Björn Sigmundur Ólafsson (Bassi): Bassatromma / sneril / tom 1 / tom 2 / floor 1 / floor 2 / hi hat / diska Helgi Rúnar Gunnarsson: Söngur / gítar / þríhorn. Lovísa Elísabet Sigrúnardóttir: Hljómborð og synthi / gítar / söngur. Magnús Árni Öder Kristinsson: Bassi / synthi / apaöskur.

Hver er heimspekin á bakvið hljómsveitina?

Ef þetta er ekki gaman þá er þetta búið.

Hvenær var hún stofnuð og hvernig atvikaðist það?

Magnús og Bassi voru búnir að vera lengi saman í annarri hljómsveit og langaði að prufa eitthvað annað. Þeir höfðu samband við Helga Rúnar og gítarleikara sem heitir Magnús Guðmundsson sem er einmitt í hljómsveitinni Hölt hóra. Fyrsta æfingin var svo í október 2003. Þetta small nú ekki saman alveg strax en fljótlega náðu allir mjög vel saman og þá fóru fallegir tónar að svífa. Fyrstu tónleikarnir voru síðan í febrúar 2004. Rétt eftir það kom Lovísa inn í hljómsveitina og þá fórum við út í þessar syntha-pælingar sem við erum rosalega mikið í í dag. Magnús Guðmundsson hætti svo í Benny í júlí 2004 til að einbeita sér betur að hinu bandinu sínu. Hljómsveitin er búin að starfa í þessari mynd síðan þá. Samt er þetta nú allt að miklu leyti Benny að þakka. Takk, Benny!

Hvaða tónlistarmenn eru hetjur ykkar?

Helgi Rúnar: Tom Waits, The Mars Volta, Radiohead, Ephel Duath, At the Drive-In, Sonic Youth, Blonde Redhead, Nirvana, Pixies... Lovísa: PJ Harvey, Nick Cave, Sonic Youth, The Mars Volta, Blonde Redhead, Portishead, Radiohead og Yeah Yeah Yeah's til dæmis.

Bassi: a perfect circle, Jeff Buckley, Mars Volta, Deftones, RHCP, Skunk Anansie, Jamiroquai, Incubus, Mánar, Trúbrot, Rage Against the Machine og margir margir fleiri.

Magnús: The Mars Volta, QOTSA, Rage Against the Machine, Blonde Redhead, Pink Foyd, Uriah Heep og og og og.

Eru einhverjir innlendir áhrifavaldar?

Auðvitað heill hellingur. Ensími, Kimono, Coral, Botnleðja, Trúbrot og auðvitað samborgarar okkar í Skímó.

Hvað finnst ykkur um íslenska tónlist í dag?

Það er allaveg ótrúlega margt skemmtilegt að gerast í íslenskri tónlist í dag, m.a. má nefna: Mugison, Coral, Hölt hóra, Pétur Þór, Telepathetics, Byltan, Tristian, Kimono, Isidor, Ókind, Bob, Lada Sport, Big Kahuna og Mammút. Það er reyndar svo mikið af góðu efni að við gætum tekið margar blaðsíður í að tala um það. Rokk.is er líka búin að gera rosalega mikið fyrir unga tónlistarmenn síðan heimasíðan var sett upp. Þar geta hljómsveitir fengið fría kynningu, comment á lögin sín og auglýst tónleika. Einnig hafa þeir í Tónlistarþróunarmiðstöðinni verið að gera góða hluti með sínu framtaki og svo náttúrulega þetta sem þið eruð að lesa!

Er auðvelt að fá að spila á tónleikum?

Já, ef maður nennir að standa í því að skipuleggja það, en við erum öll svo löt þannig að...Oftast er það þannig að einhver býður okkur að spila með sér en við erum alltof löt við að skipuleggja tónleika sjálf og við biðjum hér með allar hljómsveitirnar sem við erum búin að segjast ætla að spila með fyrirgefningar á því og reynum að bæta úr því.

Er auðvelt að gefa út?

Það er auðvelt að taka upp sjálfur ef þú hefur kunnáttuna og átt búnaðinn. Síðan getur maður gefið þetta út og dreift þessu sjálfur en það er rosalegur "prósess" að fara í gegnum.

Segið eitthvað um lögin sem þið eruð með á Rokk.is?

Þetta eru tvö lög af demói sem við gerðum áður en við byrjuðum að taka upp plötuna sem við erum að taka upp núna. Annað lagið heitir "Johnny's got a baby" og er hvorki um eiturlyfjaneyslu né barneignir.

Hitt lagið heitir "The Rising" og er fyrsta lagið sem Benny samdi.

Hver er mesti gleðigosinn í sveitinni?

Benny, hann er alveg snarbrjálaður náungi.

Hvað er á döfinni hjá ykkur?

Erum að taka upp efni sem við vitum ekkert hvar endar. En vonandi endar það með útgáfu seinna á þessu ári. Síðan væntanlega eitthvað af tónleikum, hafið endilega samband við okkur ef þið eruð með eitthvað fyrir okkur að gera.

Eitthvað að lokum?

Zed's dead baby, Zed's dead.

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.