15. mars 2007 | Viðskiptablað | 910 orð | 1 mynd

Er Buffett að fatast flugið?

Eftir Má Wolfgang Mixa

Auðkýfingur Warren Buffett hefur skilað frá sér ársskýrslu fjárfestingafélags síns, Berkshire Hathaway, og greinarhöfundur veltir því m.a. fyrir sér hvort karlinum sé eitthvað farið að förlast í fjárfestingum sínum.
Auðkýfingur Warren Buffett hefur skilað frá sér ársskýrslu fjárfestingafélags síns, Berkshire Hathaway, og greinarhöfundur veltir því m.a. fyrir sér hvort karlinum sé eitthvað farið að förlast í fjárfestingum sínum.
Fjárfestingarstefna Buffetts er: Vertu hræddur þegar aðrir eru gráðugir og vertu gráðugur þegar aðrir eru hræddir.

FRÆGASTI fjárfestir á okkar tímum, Warren Buffett, hefur aldrei sjálfur skrifað bók um fjárfestingar. Ekki er svo að skilja að hann hafi unnið eftir leyndardómsfullri fjárfestingarstefnu sem menn hafa í tugi ára verið að reyna að komast til botns í. Hann hefur þvert á móti verið afar opinskár varðandi þá þætti sem hann telur að skipti máli varðandi fjárfestingar. Hann aðstoðaði læriföður sinn, Benjamin Graham, við uppfærslu á riti þess síðarnefnda, The Intelligent Investor, þrátt fyrir að koma ekki fram sem meðhöfundur verksins á síðustu endurútgáfu bókarinnar sem gerð var árin 1971–72. Þetta rit var reyndar Buffett ekki alveg að skapi enda var Graham töluvert áhættufælnari en hann. Buffett hefur hins vegar nú í um það bil 40 ár skrifað vangaveltur varðandi fjárfestingar sínar í ársskýrslu fjárfestingarfyrirtækis síns, Berkshire Hathaway. Hafa þær fyrir löngu öðlast fastan sess sem skyldulesning fjárfesta sem vilja laga sig að Buffett-stefnunni, sem hefur reyndar þróast töluvert í gegnum tíðina.

Ávöxtun

Nýverið birtist nýjasta ársskýrslan og er fjöldamargt áhugavert í henni. Enn eitt árið var ávöxtun eigin fjár Berkshire Hathaway betri en ávöxtun S&P; 500-hlutabréfavísitölunnar. Þó hefur ávöxtun þessara viðmiða verið svipuð síðustu fjögur árin, sem er frekar lítið á Buffett-mælikvarða, því umframávöxtun hans gagnvart hlutabréfavísitölunni hefur að meðaltali verið heil 11% á ári. Auk þess var 2006 áttunda árið í röð þar sem innra virði bréfa Berkshire jókst minna en meðaltal þess síðasta 41 ár. Er Buffett að fatast flugið?

Tryggingar

Að venju fjallar Buffett töluvert um tryggingar, enda eru fjárfestingar í þeim geira ein af undirstöðum ríkidæmis hans í dag. Í ársskýrslu sinni fyrir tveimur árum var Buffett með ítarlega umfjöllun um tryggingageirann. Þar kom fram að hann hefur mikið álit á þeim stjórnendum sem þora að sigla á móti straumnum. Í kjölfar stórra skaðabótakrafna, til dæmis vegna náttúruhamfara, haldi tryggingafélög almennt að sér höndum, einmitt þegar tryggingagjöld eru sem hæst verðlögð. Þá er almenna reglan hjá félögum í eigu Buffetts að auka áhættuþor og skrifa samninga í gríð og erg. Þegar önnur félög fara á ný að taka á sig tryggingaskuldbindingar eykst verðsamkeppni og gjöldin sem tryggingafélög fá fyrir að taka á sig áhættu minnka. Það er á þeim tímapunkti sem tryggingafélög í eigu Berkshire fara að draga saman seglin.

Þó svo að Buffett þakki móður náttúru að stórum hluta hversu mikill hagnaður var á síðasta ári hjá tryggingafélögum í hans eigu stenst hann ekki mátið að benda á að nú séu tryggingafélög á hans snærum að minnka áhættugrunn sinn vegna aukinnar verðsamkeppni í geiranum. Hann segir að þetta sé í samræmi við almenna fjárfestingarstefnu sína: "Vertu hræddur þegar aðrir eru gráðugir og vertu gráðugur þegar aðrir eru hræddir."

Buffett er augljóslega nokkuð ánægður með sjálfan sig hvað þetta varðar. Það kemur þó ekki fram að það að fylgja eftir slíkri stefnu er hægara sagt en gert þegar margir eigendur eru til staðar í tryggingafélögum. Þeir stjórnendur sem sigla á móti almenningsálitinu þegar vel gengur fá klapp á bakið en þegar þeir veðja á rangan hest virðast þeir aftur á móti vera kjánalegir og fá iðulega að gjalda þess.

Ný hlutabréf í safninu

Það vakti athygli hversu lítið Buffett fjárfesti í hlutabréfum þegar gengi hlutabréfa tók dýfu niður á við í kjölfar hjöðnunar netbólunnar og uppgötvunar tíðra bókhaldssvika hjá ótrúlegustu fyrirtækjum. Í ár birtast aftur á móti fimm ný skráð fyrirtæki metin með hærra markaðsvirði en 700 milljónir dollara í eignasafni hans.

Þau eru:

* Conoco Phillips – orka

*Johnson & Johnson –

neysluvörur

*POSCO – stáliðnaður

*Tesco – verslunarkeðja í

matvælum

*US Bancorp – fjármál

Auk þess hafa tvö fyrirtæki bæst við í hópinn og er Buffett enn að auka fjárfestingar sínar í þeim. Hann segir á gamansaman hátt í skýrslunni að hann gæti vissulega sagt einhverjum hvaða fyrirtæki það væru en slíkt mundi kosta líf viðkomandi. Greinarhöfundur giskar á að eitt þessara fyrirtækja sé Home Depot. Fyrirtækið passar afar vel í þá fjárfestingarstefnu sem Buffett hefur fylgt í gegnum tíðina. Það er fremst á sínu sviði og eins og hjá Wal-Mart, sem Buffett fjárfesti mikið í árið 2005, hefur Home Depot mikla möguleika á að verða stór þátttakandi í þeirri efnahagsuppsveiflu sem nú á sér stað í Kína. Helstu hlutföll tengd markaðsvirði bréfa Home Depot í dag eru í ódýrari kantinum, sem hefur haldið pælingum um yfirtöku á lofti. Einn þeirra sem nefndir eru í því tilliti er Edward Lampert, sá sem vann sér það helst til frægðar að kaupa stóran hluta í Sears og margfalda virði þeirrar fjárfestingar.

Framkvæmdastjóri óskast

Ofangreindur Lampert er reyndar einn af fáum sem hugsanlega þykja koma til greina sem eftirmaður Buffetts hjá Berkshire. Fram kemur í skýrslunni að Berkshire hefur valið þrjá aðila sem hugsanlegan eftirmann Buffetts og ef Buffett mundi því falla skyndilega frá veit stjórn Berkshire hver tekur við. Buffett, sem er orðinn 76 ára gamall, tekur fram að allir þessir aðilar séu töluvert yngri en hann, enda sé stefnan sú að fá framtíðarframkvæmdastjóra. Enn virðist þó vera tími til að sækja um þessa stöðu því hann bætir við að í þessu ferli verði hugsanlega fleiri umsækjendur kallaðir til viðtals.

Buffett vill augljóslega fá einhvern sem er nánast nákvæmlega eins og hann. Helstu atriði sem skipta máli eru að maðurinn búi yfir visku til að þekkja og forðast alvarlega áhættu, þar með talið hættu á hlutum sem aldrei hafa áður gerst, sjálfstæðri hugsun, sálarlegu jafnvægi og skilningi á eðli manna og stofnana. Ekki kemur þó fram hvert senda eigi umsóknir en ágætis byrjun er heimasíða fyrirtækisins, www.berkshirehathaway.com.

Höfundur er sérfræðingur hjá verðbréfafyrirtækinu Nordvest.

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.