22. mars 2003 | Innlendar fréttir | 821 orð | 1 mynd

Nú verður eitthvað að gerast

Hafþór B. Guðmundsson
Hafþór B. Guðmundsson
Hafþór B. Guðmundsson fæddist í Reykjavík 26. febrúar 1954. Íþróttafræðingur frá háskólanum í Alberta. Sundþjálfari um árabil, bæði hjá landsliði og félagsliðum. Hóf kennslu við Íþróttakennaraskóla Íslands 1993.
Hafþór B. Guðmundsson fæddist í Reykjavík 26. febrúar 1954. Íþróttafræðingur frá háskólanum í Alberta. Sundþjálfari um árabil, bæði hjá landsliði og félagsliðum. Hóf kennslu við Íþróttakennaraskóla Íslands 1993. 1998 breyttist skólinn í íþróttaskóla á háskólastigi. Er lektor við skólann í dag og helstu kennslugreinar eru sundfræði, þjálffræði og skyndihjálp og björgun fyrir verðandi kennara. Maki er Sigríður V. Bragadóttir flugfreyja og framkvæmdastjóri Íþróttamiðstöðvar Íslands á Laugarvatni. Eiga fjögur börn, Braga Dór, Guðmund Svein, Árna Pál og Sigurð Orra, 26 til 12 ára.

Hafþór B. Guðmundsson fæddist í Reykjavík 26. febrúar 1954. Íþróttafræðingur frá háskólanum í Alberta. Sundþjálfari um árabil, bæði hjá landsliði og félagsliðum. Hóf kennslu við Íþróttakennaraskóla Íslands 1993. 1998 breyttist skólinn í íþróttaskóla á háskólastigi. Er lektor við skólann í dag og helstu kennslugreinar eru sundfræði, þjálffræði og skyndihjálp og björgun fyrir verðandi kennara. Maki er Sigríður V. Bragadóttir flugfreyja og framkvæmdastjóri Íþróttamiðstöðvar Íslands á Laugarvatni. Eiga fjögur börn, Braga Dór, Guðmund Svein, Árna Pál og Sigurð Orra, 26 til 12 ára.

Félagsskapur sem heitir Hollvinafélag Gufubaðsins og Smíðahússins á Laugarvatni blæs til fundar í Smíðahúsinu í dag klukkan 16. Félagið hefur á stefnuskránni uppbyggingu gamalla minja á Laugarvatni. Morgunblaðið spurði Hafþór B. Guðmundsson, lektor við Kennaraháskóla Íslands, aðeins út í félagið og fundinn.

-Segðu okkur fyrst frá félagsskap ykkar og yfirlýstum markmiðum hans.

"Þetta eru samtök sem heita Hollvinafélag Gufubaðsins og Smíðahússins á Laugarvatni. Ekki er hægt að segja frá samtökunum nema að rifja upp sögu Gufubaðsins og Smíðahússins í stuttu máli. Smíðahúsið er eitt fyrsta fimleika/leikfimishús landsins. Var það áður konungshús, notað sem sýningarskáli við Alþingishátíðina 1930 og stóð í garði Alþingishússins. Síðar fluttu nemendur af Laugarvatni húsið í pörtum hingað austur og byggðu upp sjálfir og notuðu sem leikfimishús hér á Laugarvatni, þar til íþróttasalurinn var byggður við Héraðsskólahúsið. Eftir það var Smíðahúsið meira notað til smíðakennslu og annarra slíkra verka og hefur dregið nafn sitt af þeirri starfsemi.

Gufubað hefur verið á Laugarvatni frá því 1930. Litlar breytingar hafa verið gerðar á því sjálfu. Klefar voru byggðir yfir hverinn á sínum tíma. Gríðarlegur fjöldi fólks hefur farið í gufuna á þessum árum og þá oft í tengslum við skólana sem hér hafa verið starfræktir. Mjög margir af þessum gestum hafa orðið fastagestir og miklir gufuvinir. Undanfarin ár hafa gufuvinir rætt um það þegar þeir hittast í gufunni að nú verði eitthvað að gerast til að halda Gufubaðinu gangandi, en ástand þess er vægast sagt slæmt.

Hollvinafélagið vonast til að geta samið við menntamálaráðuneytið, sem er eigandi mannvirkjanna og strandarinnar hér, um að fá að standa fyrir endurbótum á Gufubaðinu, Smíðahúsinu og umhverfi þess, standa fyrir markaðssetningu á þessu svæði til hagsbóta fyrir alla ferðaþjónustu og styrkja og efla Gufubaðið og Smíðahúsið og umhverfi fjárhagslega og á annan hátt."

-Eru umræddar minjar í niðurníðslu og liggja undir skemmdum?

"Eins og fram hefur komið, er um mjög merkar menningartengdar byggingar að ræða. Smíðahúsið var listaskáli Danakonungs á Alþingishátíðinni 1930. Liggur það undir skemmdum. Þak er farið að síga og og ytri járnklæðning ryðguð og illa farin. Gufubaðið sem á sér enga hliðstæðu í heiminum hefur verið haldið gangandi, en þarf algerrar endurnýjunar við."

-Hvað þarf mikla fjármuni og tíma í þessa uppbyggingu?

"Það hefur nú ekki verið reiknað nákvæmlega út hvað þurfi af fjármagni í þessa hluti en ljóst er að það er talsvert og hleypur á milljónum, því hugmyndin er ekki eingöngu að gera við húsin heldur allt umhverfið, það er að útbúa ylströnd með tilheyrandi þjónustu og leiktækjum, sem sagt frábæra fjölskylduparadís."

-Fundurinn í dag - markmið og áherslur?

"Já, það er rétt, við erum með fyrsta aðalfund samtakanna í dag, sem einnig er stofnfundur og þeir sem mæta verða þá stofnfélagar Hollvinasamtakanna. Samtökin hafa nú þegar fengið 5 milljóna króna fjárveitingu frá fjárveitinganefnd til að koma málinu af stað. Dagskrá fundarins verður einhvern veginn á þessa leið: Rakin verður stuttlega saga Smíðahússin og Gufubaðsins á skemmtilegan hátt. Gestir halda stuttar ræður. Einhver skemmtiatriði verða á dagskrá, en síðan verður gengið til aðalfundarstarfa sem ætti ekki að taka langan tíma þar sem aðeins verður fjallað um lög félagsins og gengið til kosninga um stjórn. Eftir aðalfundinn verður öllum boðið í gufuna sem þess óska. Loks verður veitingahúsið Lindin opið fyrir gesti og þar geta menn keypt sér léttar veitingar og haldið áfram að ræða málefnin fram eftir kvöldi.

Eins og sést er áætlað að þetta verði allt á léttu nótunum og að allir geti haft gaman af heimsókninni hingað á Laugarvatn."

-Er fundurinn öllum opinn?

"Já, þessi fundur er öllum opinn og vonumst við til að sjá sem allra flesta velunnara Gufubaðsins og Smíðahússins. Það er ljóst að margir eiga frábærar minningar frá þessum stað og vilja örugglega leggja sitt af mörkum til að viðhalda honum."

-Ef félagið kemur brýnustu málum á koppinn, eru þá ekki næg önnur verkefni til að ráðast í á Laugarvatni og jafnvel víðar á Suðurlandi?

"Við sjáum fyrir okkur mikla uppbyggingu hér á Laugarvatni og þetta er bara fyrsti hlutinn í því að gera Laugarvatn aftur að þeirri paradís fjölskyldunnar sem það var hér á árum áður."

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.